اسلام آباد(صباح نیوز) پاکستانی دفترخارجہ کی ترجمان ممتاز زہرابلوچ نے کہا ہے کہ پاکستان افغانستان کی وزارت خارجہ کے ترجمان کے غیر سنجیدہ بیان کو واضح طور پر مسترد کرتا ہے۔
پریس بریفنگ میں صحافیوں کے سوالوں کے جوابات دیتے ہوئے ممتاز زہرا بلوچ نے کہا کہ یہ بیان پاکستان کے اندرونی معاملات میں ناقابل قبول اور قابل مذمت مداخلت ہے، افغان وزارت خارجہ کو ایک جمہوری ملک پر لیکچر دینے کے بجائے اپنے گھریلو مسائل خود حل کرنے پر توجہ دینی چاہیے، شمولیت کو ترجیح دینا اور مذہب کی گمراہ کن تشریح کے ذریعے ان کے حقوق کو کم کرنے کے بجائے خواتین اور لڑکیوں کے لئے تعلیم کے حق سمیت اپنے لوگوں کی ضروریات اور خواہشات کے لئے جوابدہ ہوں۔
افغان عبوری حکومت کو دہشت گرد گروپوں کو جگہ دینے سے انکار کرتے ہوئے بین الاقوامی برادری سے کئے گئے وعدوں کو بھی پورا کرنا چاہئے جو پڑوسی ممالک میں امن اور سلامتی کو سنگین طور پر خطرے میں ڈال رہے ہیں اور افغانستان کو ایک بار پھر عالمی دہشت گردی کا مرکز بننے سے روک کر پاکستان خطے میں امن، مذاکرات اور تعاون کے لیے پرعزم ہے اور توقع کرتا ہے کہ افغانستان سمیت تمام ریاستیں ذمہ دارانہ بین الاقوامی طرز عمل اور بین الریاستی تعلقات کے بنیادی اصولوں کی پاسداری کریں گی۔
