اسلام آباد(صباح نیوز)نائب وزیر اعظم و وزیر خارجہ سینیٹر اسحاق ڈار نے کہا ہے کہ پی ٹی آئی کے احتجاج کیلئے وقت کا چناؤ افسوسناک اور قابل مذمت ہے۔سماجی رابطے کی سائٹ ایکس پر اپنے پیغام میں اسحاق ڈار نے کہا کہ 1997 کے بعد پاکستان میں عالمی اہمیت کے حامل ایس سی او سربراہی اجلاس سے پہلے احتجاج، ایسا لگتا ہے کہ یہ ایک سیاسی جماعت کی جانب سے پاکستان کی بین الاقوامی حیثیت کمزور کرنے کی دانستہ کوشش ہے۔اسحاق ڈار نے کہا کہ احتجاج اور افراتفری پھیلانے کا مقصد ایس سی او کے ایجنڈے میں خلل ڈالنا ہے اور ایک نازک لمحے میں پاکستان کی سفارتی کوششوں کو سبوتاژ کرنے کا منصوبہ ہے۔
انہوں نے کہا کہ پی ٹی آئی کے احتجاج سے خطاب کے لیے پاکستان کے دورے پر آئے وزیر خارجہ کو عوامی سطح پر مدعو کرنا بھی سیاسی فائدے کے لیے قومی مفاد اور ایس سی او سربراہی اجلاس کو نقصان پہنچانے کی کھلی کوشش ہے،انہوں نے اپنی ٹوئٹ میں لکھا کہ ایک ایسے وقت میں جب دنیا دیکھ رہی ہے، ہمیں سیاسی انتشار کی نہیں بلکہ اتحاد اور ذمہ داری کا مظاہرہ کرنے کی ضرورت ہے۔ یہ پاکستان کے لیے ایک لمحہ ہے کہ وہ اپنی طاقت، عزم اور قیادت کو معمولی خلل ڈالنے والی سیاست سے اوپر اٹھ کر دکھائے۔
