جنیوا(صباح نیوز)پاکستان نے بھارت کے غیر قانونی زیر تسلط جموں و کشمیر میں لاکھوں قابض فوجیوں کی موجودگی میں منعقد کرائے جانے والے نام نہاد انتخابات کو مضحکہ خیز قرار دیتے ہوئے کہا ہے کہ ایسے انتخابات کی کوئی حیثیت نہیں ہے۔اقوام متحدہ کی حقوق انسانی کونسل میں ایک مندوب کے اظہار خیال پر جواب کا حق استعمال کرتے ہوئے جنیوا میں اقوام متحدہ کے پاکستان مشن میں سیکنڈ سیکرٹری دانیال حسنین نے کہا کہ بھارتی مندوب نے ایک بار پھر حقوق انسانی کونسل کو مقبوضہ جموں و کشمیر میں حالیہ مضحکہ خیز انتخابات بارے بھی گمراہ کرنے کی کوشش کی۔ اپنے غیر قانونی زیر تسلط علاقے میں لاکھوں کی تعداد میں فوجیوں کی تعیناتی، سیاسی جماعتوں پر پابندی عائد کرنے ، سیاسی رہنمائوں کو پابند سلاسل کرنے اور ہزاروں کشمیریوں کو شہید و زخمی کر کے وہاں نام نہاد انتخابات کے رچائے جانے والے ڈھونگ کی کوئی حیثیت نہیں ۔پاکستانی سفارتکار نے کہا کہ بھارتی مندوب نے حقوق انسانی کونسل کے 57 ویں اجلاس کے آئٹم نمبر ۔4 پر عام بحث کے دوران کونسل کے وقت کے نہایت قیمتی ہونے کے ادراک کا دعوی کیا ، کاش وہ غیر قانونی قبضے کے تحت زندگیاں گزارنے پر مجبور لوگوں کی جانوں کے حوالے سے بھی اسی طرح حساس ہو تے۔ جموں و کشمیر پر بھارت کے غیر قانونی قبضے کے معمولی ذکر پر بھی وہ اس ڈر سے بے چین ہو جاتے ہیں کہ کہیں ان کا اصل چہرہ بے نقاب نہ ہو جائے۔ مندوب نے اپنے غیر قانونی زیر تسلط جموں و کشمیر میں غیر معمولی ترقی کا ذکر کیا۔ہم سب اچھی طرح جانتے ہیں کہ نوآبادیاتی طاقتیں علاقوں پر اپنے غیر قانونی قبضے پر پردہ ڈالنے کے لئے عام طور پر ترقی کا ہی ڈھنڈورہ پیٹتی ہیں۔دانیال حسنین نے کہا کہ ہم سب یہ بھی اچھی طرح جانتے ہیں کہ نوآبادیاتی طاقتوں کے منصوبے اصل میں زیر قبضہ علاقوں کے مکینوں کے استحصال، ان سے بدسلوکی اور عدم مساوات کو ہی دوام بخشتے ہیں۔ جموں کشمیر میں ترقیاتی منصوبوں کے مقاصد بھی کچھ مختلف نہیں۔ پاکستانی مندوب نے واضح کیا کہ مندوب نے اقوام متحدہ کی حقوق انسانی کونسل سے خطاب میں جان بوجھ کر کشمیری عوام کے حق خود ارادیت کے ذکر سے توجہ ہٹانے کی کوشش کی۔ اقوام متحدہ کی سلامتی کونسل نے اپنی کئی قرارد ادوں میں کشمیریوں کو ان کا یہ ناقابل تنسیخ حق دینے کا وعدہ کر رکھا ہے۔ گزشتہ سات عشروں سے بین الاقوامی قانون خاص طور سے اقوام متحدہ کے چارٹر کے آرٹیکل 25 کی خلاف ورزی کرتے ہوئے کشمیریوں کو ان کا یہ حق دینے سے انکار کیا جا رہا ہے
