لاہور(صباح نیوز)وزیراطلاعات پنجاب عظمیٰ بخاری نے وزیراعلیٰ خیبرپختونخوا کو چیلنج دیتے ہوئے کہا ہے کہ علی امین گنڈا پور پنجاب پر لشکر کشی کرکے تو دکھائیں، وزیراعلی خیبرپختونخوا نے پھر گندی زبان استعمال کرکے حد پار کی، جو تقریریں، حرکتیں وہاں ہوئیں، وہ انسانوں کی نہیں تھیں، جو بندہ لشکر لے کر پنجاب آیا تھا وہ اپنے حلقے میں نہیں جاسکتا، پنجاب پولیس نشئیوں کا نشہ جلدی اتار دیتی ہے، اسلام آباد میں جلاؤ گھیراؤ، پتھراؤ پر قانون حرکت میں آئے گا، فتنہ گینگ پاکستان کا امن تباہ کرنے کی سازشوں میں مصروف ہے۔
لاہور میں پریس کانفرنس کرتے ہوئے صوبائی وریراطلاعات پنجاب عظمیٰ بخاری نے کہا کہ میلہ مویشیاں میں تقریریں ختم ہونے کے بعد ان کی ذہنیت سامنے آگئی، جلسے میں بلوائیوں نے اپنی اصلیت ظاہر کردی، پوری قوم نے دیکھ لیا یہ باہر نکل کر صرف فساد اور بدتہذیبی کریں گے۔
عظمیٰ بخاری نے کہا کہ گزشتہ روز اسلام آباد پولیس کے اہلکاروں پر پتھراؤ کرکے زخمی کیا گیا، کنٹینرز گرا کر خود کو ٹارزن سمجھنے والے قوم کو کیا پیغام دے رہے ہیں، فتنہ گینگ پاکستان کا امن تباہ کرنے کی سازشوں میں مصروف ہے۔انہوںنے کہا کہ محمود اچکزئی نے پی ٹی آئی کو غیر منظم جماعت انہی کے جلسے میں قرار دیا، وزیراعلی خیبرپختونخوا نے پھر گندی زبان استعمال کرکے حد پار کی، حیران ہوں کہ علی امین گنڈا پور کی تربیت کیسے اور کن حالات میں ہوئی؟۔
وزیراطلاعات پنجاب نے کہا کہ علی امین گنڈا پور نے پنجاب لشکر کشی کی دھمکی دی، اب ان سے ان ہی کی زبان میں بات کی جائے گی، ہم صوبوں کی محبتوں کے امین ہیں۔عظمیٰ بخاری نے کہا کہ پنجاب پولیس نشئیوں کا نشہ بہت جلدی اتار دیتی ہے، جلاؤگھیراؤ کرنا بانی پی ٹی آئی کی طرف سے دی گئی تربیت ہے، پی ٹی آئی رہنماؤں نے سٹیج پر کھڑے ہوکر خواتین کی کردار کشی کی، یہ خیبرپختونخوا میں ٹی ٹی پی کو بھتہ دے کر جیتے ہیں۔انہوں نے کہا کہ جو بندہ لشکر لے کر پنجاب آیا تھا وہ اپنے حلقے میں نہیں جاسکتا، اس کے حلقے میں ٹی ٹی پی کا پورا کنٹرول ہے، خیبرپختونخوا دہشت گردی کی آگ میں جل رہا ہے ، خیبرپختونخوا طالبان کے ہاتھوں یرغمال بنا ہوا ہے۔
