لاہور(صباح نیوز) وفاقی وزیر داخلہ و انسداد منشیات محسن نقوی نے لاہور کے علامہ اقبال انٹرنیشنل ایئرپورٹ پر مسافروں کیلئے موجود سہولیات پر عدم اطمینان کا اظہار کر دیا۔
وزیر داخلہ محسن نقوی نے وفاقی وزیر ایوی ایشن و دفاع خواجہ آصف کے ہمراہ علامہ اقبال انٹرنیشنل ایئرپورٹ لاہور کا 2 گھنٹے طویل دورہ کیا۔وفاقی وزرا نے امیگریشن کاؤنٹرز پر مسافروں کے لئے انتظامات کاجائزہ لیا، اے این ایف، اے ایس ایف اور کسٹمز کے سرچ کے عمل کا بھی مشاہدہ کیا، وفاقی وزرا نے ایئرپورٹ پر مسافروں کیلئے موجود سہولتوں کا بھی جائزہ لیا۔
وفاقی وزرا نے ایئرپورٹ پر مسافروں کے لئے سہولتوں پر عدم اطمینان کا اظہار کرتے ہوئے فیصلہ کیا کہ لاہور ایئرپورٹ پر بیرون ملک جانے والے مسافروں کی سہولت کیلئے امیگریشن کانٹرز میں اضافہ ہوگا۔وزیر داخلہ نے حکم دیا کہ ایئرپورٹ پر سرچ کے طویل اور 3 درجاتی عمل کو آسان اور تیز بنایا جائے۔محسن نقوی نے اے ایس ایف، اے این ایف اور کسٹمز کے حکام سے سرچ کو سہل بنانے کا پلان طلب کر لیا اور قابل عمل پلان اگلے 24 گھنٹے میں تیار کر کے پیش کرنے کی ہدایت کر دی۔
وفاقی وزرا کی زیر صدارت ایئرپورٹ کے کانفرنس روم میں اجلاس بھی ہوا جس میں ایئرپورٹ پر مسافروں کی سہولت کیلئے اقدامات کے بارے بریفنگ دی گئی، وفاقی وزرا نے متعلقہ حکام کو مسافروں کے لئے سہولتیں بڑھانے کے لئے ضروری ہدایات دیں۔اجلاس میں گفتگو کرتے ہوئے وفاقی وزیر ایوی ایشن خواجہ آصف نے کہا کہ لاہور ایئرپورٹ پر کامیاب تجربے کے بعد سرچ کے عمل کو دیگر ایئرپورٹس پر بھی شروع کیا جائے گا، ایئرپورٹس پر مسافروں کی آمدورفت سہل بنانے کیلئے متعلقہ اداروں کو فوری اقدامات کرنے کی ضرورت ہے۔وزیر داخلہ نے بیرون ملک آمد اور روانگی ٹرمینل پر امیگریشن کے کانٹرز میں اضافے کا حکم دیتے ہوئے کہا کہ مسافروں کو انتظار کی زحمت سے بچانے کیلئے فوری طور پر امیگریشن کاؤنٹرز کی تعداد بڑھائی جائے، 3 روز میں امیگریشن کاؤنٹرز میں اضافے کا حتمی پلان پیش کیا جائے۔
محسن نقوی نے مزید کہا کہ امیگریشن کاؤنٹرز بڑھنے سے مسافروں کو انتظار سے نجات ملے گی، مسافروں کو زیادہ سے زیادہ سہولتیں فراہم کرنے کیلئے آؤٹ آف باکس اقدامات کئے جائیں۔
