اسلام آباد (صباح نیوز)وزیراعظم کی معاون خصوصی برائے امور نوجوانان شزہ فاطمہ خواجہ نے لیپ ٹاپ سکیم دوبارہ شروع کرنے کا اعلان کردیا۔شزہ فاطمہ خواجہ نے کہا کہ مسلم لیگ (ن)نے ہر دور میں نوجوانوں کے بہتر مستقبل کے لئے منصوبے شروع کیے۔
پریس کانفرنس سے خطاب کرتے ہوئے انہوں نے کہا کہ 2013 میں نواز شریف نے یوتھ پروگرام کا آغاز کیا۔مسلم لیگ (ن)نے ہر دور میں نوجوانوں کو بااختیار بنایا، نوجوانوں کے بہتر مستقبل کے لئے متعدد منصوبے شروع کئے گئے اور گزشتہ دور میں طلبہ کو لیپ ٹاپ دیئے۔ بد قسمتی سے 2018میں لیپ ٹاپ سکیم بند کر دی گئی ،رواں سال لیپ ٹاپ سکیم دوبارہ شروع کر رہے ہیں۔
شزہ فاطمہ خواجہ نے کہا کہ گزشتہ حکومت نے نوجوانوں کو شر پسندی کی طرف راغب کیا اور منفی باتوں کے ذریعے ان کی ذہن سازی کی گئی،9 مئی کو ہونے والے واقعات اسی کا تسلسل ہے ہر محب وطن ان واقعات کی شدید مذمت کرتا ہے۔
انہوں نے کہا کہ نوجوانوں میں صحت مند سرگرمیوں کو فروغ دینے کے لئے اقدامات کئے جارہے ہیں۔54 ہزار بچوں کو مختلف کھیلوں کا حصہ بنا چکے ہیں،نیشنل انوویشن پروگرام کے تحت 3 ہزار طلبہ کو انعامات دیئے جائیں گے۔
