کراچی(صباح نیوز)حلقہ خواتین جماعت اسلامی پاکستان کی مرکزی سیکرٹری جنرل دردانہ صدیقی نے پارلیمنٹ کے مشترکہ اجلاس میں حکومت اور اتحادیوں کی جانب سے بزورِ طاقت بھارتی جاسوس کلبھوشن کو ریلیف دینے کے بل کو مسلط کیے جانے کی شدید مذمت کرتے ہوئے اسے ملک و قوم سے غداری کے مترادف قرار دیا ہے۔
اپنے بیان میں انہوں نے کہا کہ مملکتِ خداداد میں دہشت گردانہ کاروائیاں اور معصوم پاکستانیوں کی جان سے کھیلنے کا اعتراف کرنے والے بھارتی جاسوس کو حکومت کی جانب سے این آر او دیا جانا ہر محبِ وطن پاکستانی کے جذبات کو بری طرح مجروح کیا ہے۔
ان کا کہنا تھا کہ نااہل حکمرانوں نے اپنی ناقص خارجہ پالیسی کے سبب پہلے کشمیر کو اٹھا کر بھارت کی جھولی میں ڈال دیا، اور اب کلبھوشن کی رہائی کا راستہ ہموار کرنے کا شرمناک فعل کررہے ہیں، قوم وزیراعظم عمران خان اور ان کے اتحادیوں کے ان جرائم کو نہ کبھی فراموش کرسکے گی، اور نہ ہی معاف۔
انہوں نے ووٹنگ بذریعہ ای وی ایم کے بل کو بھی قومی مشاورت اور ہم آہنگی کے بنا زبردستی بلڈوز کرنے کی مذمت کی اور اسے ڈیجیٹل دھاندلی کی چال قرار دیا۔ انہوں نے مطالبہ کیا کہ حکومت ہوش کے ناخن لے، اور ان تمام اقدامات سے باز آجائے جن سے ملک میں انارکی پھیلنے کا اندیشہ ہو۔
