اسلام آباد(صباح نیوز) پاکستان ، بھارت ، تاجکستان سمیت جنوبی ایشیا کے پانچ ممالک میں زلزلے کے کئی جھٹکے محسوس کیے گئے ریکٹر اسکیل پر ان زلزلوں کی شدت 4 سے لے کر 6.5 تک درج ہوئے ہیں ہفتہ کے روز صبح سے لے کر دوپہر تک پاکستان اور تاجکستان سمیت کم از کم 5 ممالک میں زلزلہ کے جھٹکے محسوس کیے گئے۔ سب سے تیز جھٹکا ٹونگا میں محسوس کیا گیا جہاں شدت 6.5 تھی۔ مقبوضہ جموں و کشمیر میں بھی زلزلہ آیا جس نے لوگوں کو خوف و دہشت میں ڈال دیا۔ لوگ گھروں سے باہر نکل گئے۔
راجوری اور پونچھ میں بیشتر لوگ گھروں سے نکل کر خالی مقامات پر پہنچ گئے تھے، حالانکہ کسی جانی و مالی نقصان کی اطلاع ابھی موصول نہیں ہوئی ہے۔ لداخ میں کچھ مقامات پر زلزلہ کے جھٹکے تیز تھے۔ یہاں ریکٹر اسکیل پر زلزلہ کی شدت 5.2 بتائی گئی ہے۔پاکستان میں زلزلہ کی شدت 5.3 درج کی گئی ہے۔ اس زلزلہ سے کئی علاقوں میں افرا تفری پھیل گئی کے پی کے پاکستان میں زلزلہ کا اثر زیادہ تھا،
تاجکستان میں ریکٹر اسکیل پر زلزلہ کی شدت 4.2 بتائی جا رہی ہے۔ یہاں زلزلہ زمین سے 110 کلومیٹر کی گہرائی میں آیا تھا۔سب سے زیادہ تیز زلزلہ ٹونگا میں آیا جہاں کی شدت 6.5 کے قریب بتائی گئی ہے۔ پاپوا نیوگنی کے نیو آئرلینڈ علاقہ کے ساحل پر بھی 6.2 شدت کا زلزلہ درج کیا گیا ہے۔ امریکی جغرافیائی سائنس سروے (یو ایس جی ایس) کے مطابق یہ جھٹکا کوکوپو سے 115 کلومیٹر دور سمندر میں 72 کلومیٹر کی گہرائی پر محسوس ہوا۔ ان دونوں ہی ممالک میں زلزلہ کے بعد خوف کا ماحول ہے۔ کسی نقصان کی اطلاع تو نہیں ملی ہے، لیکن اندیشہ ظاہر کیا جا رہا ہے کہ آفٹر شاکس کا سامنا کرنا پڑ سکتا ہے۔
