بشریٰ بی بی کا اڈیالہ جیل میں بہتر سہولیات کیلئے اسلام آباد ہائی کورٹ سے رجوع

اسلام آباد (صباح نیوز) بانی پی ٹی آئی کی اہلیہ بشریٰ بی بی نے اڈیالہ جیل میں بہتر سہولیات کے لئے اسلام آباد ہائی کورٹ سے رجوع کرلیا۔بشریٰ بی بی نے وکلا کے ذریعے اسلام آباد ہائیکورٹ سے رجوع کرتے ہوئے موقف اپنایا کہ بشریٰ بی بی بطور خاتون اول وزیر اعظم ہاس میں مقیم رہی ہیں، بشریٰ بی بی اپنی بہتر معیار زندگی کی وجہ سے قانون کے مطابق بہتر سہولیات کی حقدار ہیں، بشریٰ بی بی نے بہتر سہولیات کے لیے جیل حکام کو درخواست کی۔درخواست میں کہا گیا کہ سپرنٹنڈنٹ اڈیالہ جیل نے بشریٰ بی بی کی درخواست پر کان نہیں دھرے، بشریٰ بی بی کے شوہر بانی پی ٹی آئی کو اسی جیل میں بہتر سہولیات کا حقدار قرار دیا گیا ہے، فریقین کو اپنی قانونی ذمہ داریاں پوری کرنے کی ہدایت کی جائے۔اس درخواست میں استدعا کی گئی ہے کہ جیل رولز 1978 کے تحت بشریٰ بی بی کو بہتر سہولیات کی فراہمی کا حکم دیا جائے۔درخواست میں وفاق، سپرنٹنڈنٹ اڈیالہ جیل اور چیف کمشنراسلام آباد کو فریق بنایا گیا ہے، بشری بی بی اڈیالہ جیل میں 190 ملین پائونڈ کیس میں 7 سال قید کی سزا کاٹ رہی ہیں۔