کراچی(صباح نیوز) جماعت اسلامی نے بدامنی اوربڑھتے ہوئے اسٹریٹ کرائم کے خلاف سہراب گوٹھ تھانے پرہونے والا احتجاجی مظاہرہ ایس ایچ او کی درخواست اورامن وامان کے حوالے سے تحریری طورپراقدامات کرنے کی یقین دہانی پرملتوی کردیا ۔جماعت اسلامی ضلع گڈاپ کے نائب امیرخالدصدیقی اورصدرپبلک ایڈکمیٹی سہراب گوٹھ ٹائون ابوضیاپرویزکی قیادت میں وفد نے تھانے میں مذاکرات کیے اورسہراب گوٹھ ٹائون میں امن وامان کی مخدوش صورتحال خاص طور جمالی پل اوراس کے قرب وجوار میںقتل ،ڈکیتی ولوٹ مارکی واردادتوں پرتشویش کااظہار کیا۔ضلعی رہنما اورسابق ایم پی اے کے امیدوارخالدصدیقی نے کہاکہ سہراب گوٹھ تھانے کے حدود میں امن وامان کی بدترصورحال سے اہل علاقہ سخت اذیت سے دوچار ہیں۔
رینجرزکے اہلکارکاقتل رینجرزوپولیس کے لیے سوالیہ نشان اور ایک ٹیسٹ کیس ہے اگریہ اپنے اہلکارکے قاتلوں کو نہیں پکڑسکتے تو پھریہ عام لوگوں کو کیاتحفظ دیں گے۔انہوں نے کہا کہ 1992سے رینجرز کو یہاں قیام امن کے لیے بلایا گیا تھا ۔ رینجرز نے مسلسل اپنا قیام تو بڑھا لیا ہے مگر امن بحال نہیں ہوسکا ہے۔ہمارے احتجاج کامقصد بھی کوئی کشیدگی نہیں بلکہ امن کی بحالی اورشہریوں کی جان ومال کا تحفظ ہے۔ ایس ایچ اوکی یقین دہانی پرفی الحال مظاہرہ ملتوی کر رہے ہیں۔انہوں نے مطالبہ کیا کہ جرائم پیشہ افرادو منشیات فروشوں کیخلاف سخت کاروائی خاص طور پر اسنیپ چیکنگ بڑھائی جائیں، جتنی سروسزسڑکیں ہیں وہاں پرسرعام جرائم ہوتے ہیں اس لیے وہاں گشت اورکیمرے نصب کئے جائیں اورعوام سے عدم تحفظ کا احساس ختم کیاجائے۔جب تک امن امان بحال نہیں ہوگا جماعت اسلامی اپنی جدوجہد جاری رکھے گی۔
