برسلز (صباح نیوز)مقررین نے کہا ہے کہ کشمیری خواتین کے خلاف مظالم پر عالمی برادری کی خاموشی قابل تشویش ہے، یورپی یونین کے ہیڈکوارٹرز برسلز میں کشمیرکونسل ای یو کے زیراہتمام بین الاقوامی وومن کانفرنس کے مقررین نے کشمیری خواتین کے خلاف بھارتی ظلم و ستم پر عالمی برادری کی خاموشی پر تشویش کا اظہار کیا ہے، کشمیر کونسل یورپ نے یورپی پریس کلب برسلز میں کشمیر وومن کانفرنس کا انعقاد کیا جس میں مقبوضہ جموں و کشمیر میں بھارتی افواج کے ہاتھوں خواتین پر ہونے والے مظالم کو بھرپور انداز میں اجاگر کیا گیا۔
کانفرنس میں ممتاز شخصیات نے شرکت کی۔ کانفرنس کے مقررین میں چیئرمین کشمیر کونسل یورپ علی رضا سید، یورپی خاتون ایلا فاروقی، کشمیری خاتون سکالر آمنہ اقبال سردار اور نوجوان کشمیری دانشور وصی سید شامل تھے۔ کانفرنس کی نظامت کے فرائض انسانی حقوق کی فعال کارکن نوین قیوم نے انجام دیئے ۔ مقررین نے کہا کہ مقبوضہ کشمیر میں بھارتی افواج منظم طریقے سے خواتین کو اپنے ظلم و ستم کا نشانہ بنا رہی ہیں۔ 1991 میں کنن پوشپورہ میں خواتین کے خلاف اجتماعی زیادتی کا واقعہ اور 2009 میں آسیہ اور نیلوفر کا بہیمانہ قتل جیسے دردناک واقعات آج بھی کشمیری قوم کے زخم تازہ کر دیتے ہیں لیکن اب تک متاثرین کو انصاف نہیں ملا۔ انہوں نے کہا کہ یہ واقعات کوئی معمولی واقعات نہیں بلکہ ایک منظم اور بھیانک ریاستی پالیسی کا حصہ ہیں جس کے تحت خواتین کو جنگی ہتھیار کے طور پر استعمال کیا جاتا ہے، انسانی حقوق کی عالمی تنظیمیں ان مظالم کو بارہا اجاگر کر چکی ہیں، مگر بھارتی فورسز کو مکمل استثنی حاصل ہے۔
مقررین نے کہاکہ ہم ان مظالم کو اجاگر کرنے کے لیے عالمی فورموں پر اپنی جدوجہد جاری رکھیں گے۔ کانفرنس میں 30 سے زائد خواتین نے شرکت کی، جنہوں نے کشمیری خواتین کے حق میں آواز بلند کی اور عالمی ضمیر کو جھنجھوڑنے کی کوشش کی۔ شرکا کا کہنا تھا کہ اب وقت آ گیا ہے کہ عالمی برادری کشمیری خواتین سمیت کشمیریوں پر مظالم کے بارے میں اپنی خاموشی توڑے، مظالم بند کروائے اور انسانی حقوق کے علمبردار خرم پرویز اور اہم کشمیری سیاسی رہنما یاسین ملک سمیت تمام کشمیری اسیران کو رہا کیا جائے۔ چیئرمین کشمیرکونسل ای یو علی رضا سید نے کہاکہ امن کا تعلق انصاف سے ہے اور جب تک کشمیریوں کو انصاف نہیں مل جاتا، اس وقت تک جنوبی ایشیا کے پورے خطے میں دیرپا خوشحالی اور پائیدار امن قائم نہیں ہوسکتا۔ کشمیریوں کی دیرینہ خواہش ہے کہ خطے میں مستقل امن قائم ہو اور خطے کے عوام خوشحال زندگی بسر کریں۔انہوں نے آخر میں تمام مقررین، شرکا اور بالخصوص کانفرنس کے انتظامات کے حوالے سے کشمیر کونسل ای یو کی ٹیم کا شکریہ ادا کیا جنہوں نے اس اہم تقریب کو کامیاب بنانے میں کلیدی کردار ادا کیا۔
