لاہور (صباح نیوز) وزیراعظم شہباز شریف نے جاتی امرا میں مسلم لیگ (ن) کے قائد میاں محمد نواز شریف سے ملاقات کی۔ پنجاب بڑا بھائی ہے، بلوچستان میں ہر حال میں امن قائم کریں گے۔ تفصیلات کے مطابق وزیراعظم شہباز شریف نے جاتی امرا میں مسلم لیگ (ن) کے قائد محمد نواز شریف سے ملاقات کی، ملاقات میں ملکی موجودہ صورتحال اور اہم امور پر مشاورت کی گئی۔
وزیراعظم شہباز شریف کی جاتی امرامیں مسلم لیگ (ن) کے قائد محمد نواز شریف سے ملاقات میں دونوں رہنمائوں کی اہم سیاسی و قومی اہمیت کے امور پر تبادلہ خیال ہوا۔ وزیراعظم شہباز شریف نے نواز شریف کو ملک کی موجودہ سیاسی و معاشی اور بلوچستان کی صورتحال سے آگاہ کیا اور اہم امور پر مشاورت کی۔ وزیراعظم نے ملاقات میں بلوچستان کے وزیر اعلی سے ہونے والی تفصیلی گفتگو پر بھی بریفنگ دی۔ اس موقع پر مسلم لیگ (ن) کے قائد نواز شریف نے وزیراعظم کو ہدایت دی کہ بلوچستان میں ہر حال میں امن قائم کیا جائے۔ پنجاب بڑا بھائی ہے۔ بلوچستان کے بھائیوں کی ہر طرح کی مدد اور عوام کو زیادہ سے زیادہ ریلیف فراہم کریں۔
