اسلام آباد (صباح نیوز) وفاقی وزیربرائے اطلاعات عطااللہ تارڑ ایڈووکیٹ کی جعفر ایکسپریس کے دلسوز سانحہ پرخصوصی گفتگو کرتے ہوئے کہا کہ اللہ تعالی کا شکر ہے بلوچستان میں آپریشن منطقی انجام کو پہنچا۔ وفاقی وزیر اطلاعات نے کہا کہ پاکستانی شہریوں کو یرغمال بنانے والے 33دہشت گردوں کو جہنم واصل کیا گیا،انہوں نے کہا کہ آپریشن شروع ہونے سے پہلے 21جانوں کا نقصان ہوا، پاک فوج کے 4جوان شہید ہوئے۔
وفاقی وزیر اطلاعات نے کہا کہ آپریشن کے دوران بہادری اور دلیری کے ساتھ پاک فوج کے جوانوں نے دہشتگردوں کے ساتھ مقابلہ کیا۔ انہوں نے کہا کہ ٹرین میں 440افراد سوار تھے، پاک فوج، ایف سی، ایس ایس جی اور ایئر فورس نے مہارت سے اس آپریشن کو مکمل کیا۔ وفاقی وزیر اطلاعات نے کہا کہ بھارتی میڈیا کی طرف سے بہت افسوسناک پروپیگنڈا کیا گیا، کچھ سیاسی عناصر نے اس افسوسناک واقعہ کو اپنی سیاست چمکانے کے لئے استعمال کیا۔
انہوں نے کہا کہ انڈین میڈیا، بی ایل اے اور پی ٹی آئی اس واقعہ پر ایک زبان بول رہے تھے، کاش یہ اس آپریشن کے حوالے سے مصدقہ معلومات پر بات کرتے۔ وفاقی وزیر اطلاعات، زیراعظم نے کامیاب آپریشن پر سیکورٹی فورسز کی صلاحیتوں کی تعریف کی ہے، وفاقی وزیر اطلاعات نے کہا کہ اس سانحہ پر جو سیاست کھیلی گئی، اس کی مذمت کرتے ہیں۔پاکستان میں اس طرح کے واقعات کی کسی کو اجازت نہیں دی جائے گی۔
انہوں نے کہا کہ یرغمال مسافروں کو بازیاب کرا کے محفوظ مقام پر منتقل کیا گیا، جھوٹا بیانیہ بنانے پر تحریک انصاف کو شرمسار ہونا چاہئے۔ ان کا کہنا تھا کہ اللہ کا شکر ہے ہم بڑے نقصان سے بچ گئے ہیں، جب تک دہشت گردی کا خاتمہ نہیں ہو جاتا، ہم چین سے نہیں بیٹھیں گے۔ انہوں نے مزید کہا کہ دہشتگردی کے ناسور کو جڑ سے اکھاڑ پھینکیں گے۔ پاکستان کو امن کا گہوارہ بنائیں گے۔
انہوں نے کہا کہ دہشتگردی کی کارروائیوں کے خلاف افواج پاکستان، سیکورٹی فورسز، پولیس اور رینجرز متحرک ہیں۔دہشتگردوں کا تعاقب کیا جائے گا۔ ان کا کہنا تھا کہ بلوچستان آپریشن انتہائی پیشہ ورانہ صلاحیت سے مکمل کیا گیا، انہوں نے کہا کہ محمد شہباز شریف، حکومت پاکستان، افواج پاکستان، چیف آف آرمی اسٹاف جنرل عاصم منیر کا دہشت گردی کے ناسور کو جڑ سے اکھاڑنے کا غیر متزلزل عزم ہے۔بی ایل اے کے دہشت گردوں نے اپنے آپ کو ایکسپوز کیا، ان کی سازش ناکام ہوئی،
ان کا کہنا تھا کہ دہشتگرد کبھی بھی اپنے مذموم مقاصد میں کامیاب نہیں ہوں گے۔ انہوں نے کہا کہ دہشتگردی کے ناسور سے نمٹنے کے لئے حوصلے اور ہمت کے ساتھ تیار ہیں۔ عطااللہ تارڑنے کہا کہ وزیراعظم شہباز شریف کی وزیراعلی بلوچستان سے بات ہوئی ہے، کل وزیراعظم بلوچستان کا دورہ کریں گے اور تفصیل سے لائحہ عمل پر روشنی ڈالیں گے۔
