اسلام آباد(صباح نیوز)ملتان اور ڈیرہ غازی خان میں غیر قانونی ایل پی جی بازر میں دھماکوں کے واقعات پر سینیٹ کی قائمہ کمیٹی برائے کابینہ سیکرٹریٹ نے سخت نوٹس لیتے ہوئے چیئرمین اوگرا کو ذاتی حیثیت میں طلب کر لیا۔کیبنٹ سیکرٹریٹ کمیٹی نے اوگرا سمیت تمام متعلقہ اداروں سے جواب بھی طلب کر لیا۔
نوٹس میں کہا ہے کہ غیر قانونی ایل پی جی بازر میں دھماکوں سے ملتان میں قیمتی جانوں کا ضیاع ہوا، دھماکوں کے باعث 6 ہلاکتیں اور 38 افراد زخمی ہوئے، بائوزر پھٹنے سے گھروں سمیت متعدد گاڑیوں کو نقصان بھی پہنچا۔ اوگرا کی جانب سے غیر قانونی بازر کی روک تھام سے متعلق اقدامات کی تفصیلات بھی طلب کی گئی ہیں۔واضح رہے کہ تین روز کے دوران مختلف شہروں میں ایل پی جی بازر پھٹنے سے دھماکے ہوئے تھے۔ بازر پھٹنے کا پہلا واقع ملتان جبکہ دوسرا ڈیرہ غازی خان میں ہوا تھا۔