اے این ایف کی کارروائیاں، 227.640 کلو گرام منشیات برآمد ،7ملزمان گرفتار

راولپنڈی (صباح نیوز)اینٹی نارکوٹکس فورس (اے این ایف )نے کارروائیوں کے دوران 227.640 کلو گرام منشیات برآمد کرلی اور 7ملزمان گرفتار کر لئے ۔ترجمان اے این ایف کے مطابق اے این ایف کا ملک کے مختلف شہروں میں منشیات سمگلنگ کے خلاف کریک ڈائون جاری ہے، 7کارروائیوں میں 7ملزمان گرفتار کئے گئے۔ کاروائیوں میں2کروڑ50لاکھ روپے سے زائد مالیت کی 227.640 کلو گرام منشیات برآمد ہوئی، لاہور ایئرپورٹ پر جدہ جانے والے مسافر کے پیٹ سے 76ہیروئن بھرے کیپسولز برآمد ہو ئے۔ سرینگر ہائی وے اسلام آباد کے قریب کار کے خفیہ خانوں میں چھپائی گئی 28.8 کلو افیون اور 98.4 کلو چرس برآمدہوئی جبکہ 2ملزمان گرفتار کر لئے گئے ، راوی ٹول پلازہ لاہور کے قریب کار سے 38.4 کلو چرس برآمد اور ملزم گرفتارکر لیا گیا۔ کالا شاہ کاکو ٹول پلازہ لاہور کے قریب کار سے 33.6 کلو چرس برآمدکر لی گئی جبکہ ملزم کو بھی گرفتار کر لیا گیا ، پیٹارو ٹول پلازہ جامشورو کے قریب ملزم کے قبضے سے 12 کلو چرس برآمدہوئی ، بلوچستان میں تربت سے 10 کلو گرام آئس برآمدکر لی گئی ، پشاور میں پارک کے قریب ملزم کے قبضے سے 6 کلو افیون برآمدہوئی۔ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا۔