اسلام آباد(صباح نیوز)سپریم کورٹ آف پاکستان کاآئینی بینچ 16دسمبرسوموار سے شروع ہونے والے عدالتی ہفتے کے دوران کیسز کی سماعت نہیں کرے گا۔ سپریم کورٹ میں 18دسمبرسے31دسمبر تک موسم سرماکی چھٹیوں کے باعث سپریم کورٹ کاآئینی بینچ 16دسمبر سے شروع ہونے والے عدالتی ہفتے کے دوران مقدمات کی سماعت نہیں کرے گا۔ بینچ کے کچھ ارکان چھٹیوں پرہوں گے جبکہ دیگر ارکان سپریم کورٹ کے ریگولر بینچوںکے طور پر مقدمات کی سماعت کریں گے۔سپریم کورٹ کے حاضر سروس 18ججز میں سے 16ججز 16دسمبرسوموار سے شروع ہونے والے عدالتی ہفتے میں مقدمات کی سماعت کریں گے جبکہ جسٹس مسرت ہلالی اور جسٹس نعیم اخترافغان کسی بھی بینچ کاحصہ نہیں ۔ چیف جسٹس آف پاکستان جسٹس یحییٰ خان آفریدی کی سربراہی میں جسٹس ملک شہزاد احمد خان پر مشتمل 2رکنی بینچ سوموارسے جمعہ تک سپریم کورٹ کی پرنسپل سیٹ پرکل 230 مقدمات کی سماعت کرے گا۔ بینچ سوموار سے جمعرت تک روزانہ 50،50اورجمعہ کے روز 30مقدمات کی سماعت کرے گا۔
جسٹس جمال خان مندوخیل کی سربراہی میں جسٹس اطہر من اللہ پر مشتمل 2رکنی بینچ سپریم کورٹ کی پرنسپل سیٹ پر سوموار 16دسمبرسے جمعہ 20دسمبر تک کل 58مقدمات کی سماعت کرے گا۔سپریم کورٹ کے ایڈہاک جج جسٹس سردارطارق مسعود کی سربراہی میں ایڈہاک جج جسٹس مظہر عالم خان میاں خیل پر مشتمل 2رکنی بینچ سوموار اور منگل کے روز سپریم کورٹ کی پرنسپل سیٹ پر کل50مقدمات کی سماعت کرے گا۔ سپریم کورٹ کے سینئر ترین جج جسٹس سید منصورعلی شاہ کی سربراہی میں جسٹس عائشہ اے ملک اور جسٹس شاہد وحید پر مشتمل 3رکنی بینچ منگل کے روز 10مقدمات کی سماعت کرے گا۔
جسٹس سید منصورعلی شاہ کی سربراہی میں جسٹس عائشہ اے ملک پر مشتمل 2رکنی بینچ بدھ سے جمعہ تک کل 28مقدمات کی سماعت کرے گا۔ جسٹس عائشہ اے ملک کی سربراہی میں جسٹس شاہد وحید پر مشتمل بینچ سوموار کے روز سپریم کورٹ لاہور رجسٹری میں 22مقدمات کی سماعت کرے گا۔ جسٹس منیب اخترکی سربراہی میں جسٹس عرفان سعادت خان اور جسٹس عقیل احمد عباسی پر مشتمل 3رکنی بینچ سوموار اور منگل کے روز سپریم کورٹ کراچی رجسٹری میں 12،12مقدمات کی سماعت کرے گا۔ جسٹس عرفان سعادت خان کی سربراہی میں جسٹس عقیل احمد عباسی بدھ سے جمعہ تک سپریم کورٹ کراچی رجسٹری میں کل42کیسز کی سماعت کرے گا۔
آئینی بینچ کے سربراہی جسٹس امین الدین خان کی سربراہی میں جسٹس شاہد بلال حسن پر مشتمل 2رکنی بینچ سپریم کورٹ لاہور رجسٹری میں سوموار اورمنگل کے روز45,45مقدمات کی سماعت کرے گا۔ جسٹس امین الدین خان کی سربراہی میں جسٹس شاہد وحید پر مشتمل 2رکنی بینچ بدھ سے جمعہ تک روزانہ 20،20مقدمات کی سماعت کرے گا۔جسٹس عائشہ اے ملک کی سربراہی میں جسٹس شاہد وحید پر مشتمل بینچ سوموار کے روز سپریم کورٹ لاہور رجسٹری میں 22مقدمات کی سماعت کرے گا۔ جسٹس محمد علی مظہر کی سربراہی میں جسٹس سید حسن اظہررضوی پر مشتمل سوموار سے جمعہ تک سپریم کورٹ کراچی رجسٹری میں کل 72مقدمات کی سماعت کرے گا۔
