پشاور (صباح نیوز)تحریک انصاف اور وفاقی حکومت کے درمیان مذاکرات کے لیے بیک ڈور رابطے شروع ہوگئے ہیں۔نجی ٹی وی کے مطابق وفاقی حکومت اور تحریک انصاف کے درمیان مذاکرات کے لیے رابطوں کے بعد تحریک انصاف سے بیک ڈور رابطوں کا آغاز ہوگیا ہے۔
سابق وفاقی وزیر محمد علی درانی کی وزیراعلی خیبرپختونخوا سے ملاقات بھی اس سلسلے کی ایک کڑی ہے۔سابق وفاقی وزیر اور سابق سینیٹر محمد علی درانی نے وزیر اعلی ہائوس پشاور میں علی امین گنڈاپور سے ملاقات کی۔ جس میں موجودہ ملکی سیاسی صورتحال اور سیاسی مفاہمتی عمل کو آگے بڑھانے پر تبادلہ خیال کیا گیا۔ وزیر اعلی کے مشیر برائے اطلاعات و تعلقات عامہ بیرسٹر محمد علی سیف بھی ملاقات میں موجود تھے۔ ملاقات میں ملکی سیاسی میدان میں مفاہمت کے عمل کے لئے مشترکہ کوششوں پر اتفاق کیا گیا۔
دریں اثنا وزیر اعلی علی امین گنڈا پور نے جماعت اسلامی کے سینئر رہنماء لیاقت بلوچ اور گرینڈ ڈیموکریٹک الائنس کے مرکزی رہنما صفدر عباسی سے ٹیلیفونک رابطہ کیا۔ ٹیلیفونک گفتگو میں ملکی سیاسی صورتحال پر تبادلہ خیال ور ملک کی موجودہ سیاسی صورتحال میں مفاہمت کے عمل کو موقع دینے اور اس سلسلے میں کوششوں کو تیز کرنے پر اتفاق کیا گیا۔ نجی ٹی وی کے مطابق وزیراعلیٰ اور تحریک انصاف کی مرکزی قیادت کی جانب سے دوسری سیاسی جماعتوں سے رابطے کا امکان ہے۔
