اسلام آباد (صباح نیوز) کشیدہ سیاسی صورتحال کے باوجود اسٹاک ایکسچینج نیا ریکارڈ بنانے میں کامیاب ۔اسٹاک مارکیٹ پہلی بار 99ہزار پوائنٹس کی حد عبور کرگئی۔ تفصیلات کے مطابق دوران ٹریڈنگ اسٹاک مارکیٹ نے 99 ہزار پوائنٹس کی ریکارڈ سطح کو بھی عبور کیا،اسٹاک مارکیٹ میں دوران ٹریڈنگ 1500سے زائد پوائنٹس کا اضافہ بھی ہوا،کاروبار کے اختتام پر ہنڈریڈ انڈیکس 281پوائنٹس بڑھ کر 98080پوائنٹس پر بند ہوا۔
تجربہ کاروں کا کہنا ہے کہ بینکوں اور ٹیکنالوجی کے شیئرز میں خریداری سے مارکیٹ مثبت زون میں رہی،آج مارکیٹ میں 25 ارب 61 کروڑ روپے مالیت کے 64 کروڑ شیئرز کا لین دین ہوا۔ لاک ڈائون اور سیاسی صورتحال کو لیکر سرمایہ کار محتاط ہیں،گزشتہ روز کے اختتام پر پاکستان اسٹاک مارکیٹ 97 ہزار 798 پوائنٹس پر بند ہوئی تھی۔ بعد ازاں انڈیکس گزشتہ روز کے مقابلے میں 281 پوائنٹس اضافے کے ساتھ 98 ہزار پر بند ہوا۔ ٹاپ لائن سیکیورٹیز کے چیف ایگزیکٹیو محمد سہیل نے کہا کہ مارکیٹ میں ان غیر مصدقہ قیاس آرائیوں کے باعث تیزی ہے کہ اسٹیٹ بینک آف پاکستان سیونگ اکائونٹس کے لیے کم از کم ڈپازٹ ریٹ(ایم ڈی آر)پر بینکوں کے لیے نرمی کر سکتا ہے۔
جبکہ چیس سیکیورٹیز کے ڈائریکٹر ریسرچ یوسف ایم فاروق نے کہا کہ اے ڈی آر (ایڈوانس ٹو ڈپازٹ ریشو) پر ٹیکس خاتمے اورایم ڈی آر میں تبدیلیوں کی افواہیں بینکنگ اسٹاکس میں تیزی کی وجہ بنیں اور مارکیٹ میں مثبت رجحان دیکھا گیا یہاں تک کہ سرمایہ کار دوسرے شعبوں میں بھی محتاط رہے۔ گزشتہ کئی روز سے اسٹاک مارکیٹ میں مثبت رجحان دیکھا جا رہا ہے کاروباری ہفتے کے آخری روز پاکستان اسٹاک ایکسچینج تیزی کا رجحان دیکھا گیا اور انٹرا ڈے ٹریڈنگ کے دوران بینچ مارک کے ایس ای-100 انڈیکس 2000 پوائنٹس اضافے کے ساتھ پہلی بار 99 ہزار کی تاریخی حد عبور کر گیا تھا۔ اے کے ڈی سیکیورٹیز کے ڈائریکٹر ریسرچ اویس اشرف نے کہا تھا کہ بینچ مارک میں تیزی کی وجہ رٹیلائزر سیکٹر کی کارکردگی ہے۔ انہوں نے مزید کہا تھا کہ فوجی فرٹیلائزر کمپنی (ایف ایف سی)اور فوجی فرٹیلائزر بن قاسم لمیٹڈ (ایف ایف بی ایل)کے منافع کی وجہ سے مارکیٹ میں مثبت رجحان ہے اور اس کے باعث سیاسی خدشات پس منظر میں چلے گئے ہیں۔
اویس اشرف نے کہا تھا کہ جب لوگ موجودہ سیاسی بے یقینی صورتحال کی وجہ سے محتاط رہتے ہیں تو ادارے مقررہ آمدنی میں کمی اور میکرو اکنامک آٹ لک میں بڑھتے اعتماد سے حوصلہ پا کر فعال طور پر اپنا ایکویٹی پورٹ فولیو بنا رہے ہیں۔ ٹاپ لائن سیکیورٹیز کے چیف ایگزیکٹیو محمد سہیل نے بھی اسی طرح کے خیالات کا اظہار کیا تھا اور کہا تھا کہ آج اسٹاک مارکیٹ میں تیزی کی قیادت کھاد سیکٹر نے کی۔ چیس سیکیورٹیز کے ڈائریکٹر ریسرچ یوسف ایم فاروق نے کہا کہ آج مارکیٹ میں تیزی پی آئی بی (پاکستان انویسٹمنٹ بانڈز)کے منافع میں کمی کی وجہ ہے جب کہ فنڈز، انشورنس کمپنیاں، اور انفرادی سرمایہ کار بتدریج فکسڈ انکم انسٹرومنٹس سے ایکویٹی کی طرف منتقل ہو رہے ہیں۔
