کابل(صبا ح نیوز) افغانستان کے شہر فیض آباد میں سڑک کنارے کھڑی موٹرسائیکل میں اس وقت دھماکہ ہوگیا جب وہاں سے طالبان فوج کی گاڑیوں کا قافلہ گزر رہا تھا۔دھماکے میں فوجی گاڑی تباہ جبکہ6 اہلکار جاںبحق اور 8 زخمی ہوگئے عالمی خبر رساں ادارے کے مطابق موٹر سائیکل میں بارودی مواد بھرا ہوا تھا جسے ریموٹ کنٹرول ڈیوائس کے ذریعے اڑایا گیا۔ دھماکا اتنا زور د ار تھا کہ طالبان ملٹری کی گاڑی مکمل طور پر تباہ ہوگئی۔تاحال کسی شدت پسند گروپ نے حملے کی ذمہ داری قبول نہیں کی تاہم طالبان کے 2021 میں اقتدار سنبھالنے کے بعد سے فوجی قافلوں،
امام بارگاہوں اور حکومتی دفاتر پر حملوں میں داعش خراسان ملوث رہی ہے۔دھماکے کے بعد جائے وقوعہ پر ہر طرف انسانی اعضا بکھر گئے۔ 3 اہلکار موقع پر ہی جاں بحق ہوگئے جب کہ 10 سے زائد زخمی ہیں۔ جاں بحق اور زخمی ہونے والوں کو قریبی اسپتال منتقل کیا گیا۔جہاں مزید 3 زخمیوں نے دوران علاج دم توڑ دیا جس کے نتیجے میں ہلاکتوں کی مجموعی تعداد بڑھ کر 6 ہوگئی۔ 2 زخمیوں کی حالت نازک بتائی جا رہی ہے۔ طالبان نے علاقہ کا محاصرہ کرکے سرچ آپریشن شروع کردیا۔
