پشاور(صباح نیوز) خیبرپختونخوا میں بارش کے باعث مختلف دیواریں اور چھتیں گرنے سے 4 افرادجاں بحق اور 7 زخمی ہوگئے۔خیبرپختونخوا میں گزشتہ روز بارشوں میں ہونے والے جانی و مالی نقصانات سے متعلق پی ڈی ایم اے نے رپورٹ جاری کر دی۔
رپورٹ کے مطابق مختلف اضلاع میں دیواریں اور چھتیں گرنے سے 15مکانات کو نقصان پہنچا، بارش سے 2 گھر مکمل تباہ ہوئے جبکہ 13 گھروں کو جزوی نقصان پہنچا۔پی ڈی ایم اے کی رپورٹ میں بتایا گیا کہ دیراپر،لوئرچترال، سوات اور بونیر میں چھتیں گرنے کے واقعات ہوئے، متاثرہ اضلاع میں امدادی سامان متاثرین کو فراہم کیا گیا، لوئر چترال کے متاثرین کے لیے 200خیمے روانہ کردئیے گئے۔واضح رہے کہ جنوبی پنجاب اور بلوچستان میں گرج چمک کے ساتھ بارشیں ہوئی اور اس دوران آسمانی بجلی گرنے سے 25 افراد جان سے گئے۔
