اسلا م آباد(صباح نیوز)وزیراعظم شہباز شریف کا کہنا ہے کہ اسرائیلی جارحیت کا شکار فلسطینی مسائل کا شکار ہیں جن کی ہر سطح پر مدد کے لیے پاکستان تیار ہے۔جب بھی پاکستان مشکل میں آیا سعودی عرب نے دل کھول کر ساتھ دیا، سیرت میوزیم اسلاموفوبیا کے ناپاک پروپیگنڈے کے خاتمے میں اہم کردار ادا کرے گا، وزیراعظم ہفتہ کی شب اسلام آباد میں سیرت میوزیم کے سنگ بنیاد کی تقریب سے خطاب کر رہے تھے، سیرت نبویۖ پر آگاہی کیلئے تعمیر ہونے والے سیرت میوزیم کے سنگ بنیاد کی تقریب اسلام آباد میں ہوئی، جس میں مسلم ورلڈ لیگ کے سیکریٹری جنرل ڈاکٹر محمد بن عبد الکریم آل عیسی نے بھی شرکت کی،
تقریب میں وزیراعظم شہباز شریف بطور مہمان خصوصی شریک ہوئے،تقریب سے خطاب کرتے ہوئے وزیراعظم نے بتایا کہ اس میوزیم کی تعمیر میں خادم الحرمین شریفین اور سعودی ولی عہد نے اہم کردار ادا کیا ہے جس پر میں ان کا شکر گزار ہوں۔انہوں نے امید ظاہر اور دعا کی کہ یہ میوزیم اسلامو فوبیا کے خلاف ہونے والے پروپیگنڈے کے خلاف ایک توانا آواز بن کر ابھرے گا اور نظریاتی طور پر ہونے والے اختلاف و مسلمانوں کیخلاف ہونے والے پروپیگنڈے کا بھرپور مقابلہ بھی کرے گا۔میوزیم کے اغراض و مقاصد بیان کرتے ہوئے شہباز شریف نے کہا کہ سیرت میوزیم اسلامو فوبیا کے ناپاک پروپیگنڈے کے خاتمے میں اہم کردار ادا کرے گا کیونکہ گزشتہ چند دہائیوں سے اسلام اور مسلمانوں کے بارے میں عالمی سطح پر منفی پروپیگنڈا کیا جارہا ہے۔سیرت میوزیم کا قیام ایک عظیم منصوبہ ہے جو منفی پروپیگنڈے کا بھرپور جواب دے گا۔وزیراعظم شہباز شریف نے رابطہ عالم اسلامی کے سیکریٹری جنرل کی پاکستان آمد پر ان کا شکریہ ادا کرتے ہوئے حکومت اور عوام کی طرف سے ان کو خوش آمدید کہا۔
ان کا کہنا تھا کہ فلسطینی اس وقت اسرائیلی جارحیت اور شدید مسائل کا شکار ہیں جس کے لیے رابطہ عالمی اسلامی کا ادارہ بڑے پیمانے پر کام کررہا ہے۔انہوں نے یقین دہانی کرائی کہ پاکستان ہر سطح پر مسائل کا شکار مظلوم فلسطینیوں کی مدد کے لیے تیار ہے۔وزیراعظم نے کہا کہ سعودی ولی عہد پاکستان کے لیے بے پناہ محبت کرتے ہیں جس کا اظہار انہوں نے اپنے حالیہ دورے میں بھی کیا ہے،سعودی قیادت کے جذبات اور خصوصی توجہ پاکستان کے لیے قیمتی سرمایہ ہے اور محمد بن سلمان نے خود کہا کہ پاکستان ہمارے دل کے بہت قریب ہے۔شہباز شریف کا کہنا تھا کہ سعودی عرب ہر اچھے اور برے وقت میں پاکستان کے ساتھ کھڑا رہا ہے اور مشکل میں ہمیشہ ہمارے ساتھ دل کھول کر تعاون کرتا ہے۔انہوں نے مزید بتایا کہ حالیہ دورے میں ولی عہد محمد بن سلمان نے یقین دہانی کرائی کہ سعودی عرب پاکستان کو کبھی تنہا نہیں چھوڑے گا کیونکہ سعودی عرب پاکستان اور عوام کیلیے بے پناہ محبت کے جذبات رکھتا ہے۔وزیراعظم نے کہا کہ پاکستان کیلیے سعودی عرب کی خصوصی توجہ قیمتی سرمایہ ہے، فیصل مسجد سے سیرت میوزیم تک سعودی عرب کی محبتوں کے نشانات دیکھے جا سکتے ہیں، سعودی ولی عہد نے کہا کہ سعودی عرب پاکستان کو کبھی تنہا نہیں چھوڑے گا، سعودی حکومت پاکستان کیلئے بے پناہ محبت کے جذبات رکھتی ہے ،شہباز شریف نے بتایا کہ بہت جلد سعودی عرب سے اعلی سطح کا وفد پاکستان کا دورہ کرے گا جس سے دونوں ممالک کے درمیان تعلقات کی نئی راہیں کھلیں گی،سعودی ولی عہد نے کہا پاکستان ان کے دل کے قریب ہے، رابطہ عالم اسلامی کے سیکریٹری جنرل کی گفتگو سے ہمیشہ پاکستان کیلئے محبت نظر آتی ہے۔شہباز شریف نے مزید کہا کہ پاکستان کی ترقی کیلئے سعودی عرب مختلف شعبوں میں تعاون فراہم کر رہا ہے، وزیراعظم نے کہا کہ گزشہ دہائی میں وسائل پر قبضے کی جنگ کی وجہ سے نظریاتی تصادم پیدا کیا گیا، اسلام اور مسلمانوں سے متعلق منفی اور گمراہ کن پروپیگنڈا کیا جاتا رہا ہے،سیرت میوزیم میں نبی آخرالزماں حضرت محمد صلی اللہ علیہ وسلم کی حیاتِ پاک کے مختلف مراحل اور سیرت طیبہ کے مختلف پہلووں کا مشاہدہ جدید ٹیکنالوجی کی مدد سے کیا جا سکے گا۔وزیراعظم نے تقریب میں کم سِن(دس برس کی عمر سے کم) اور ایسے حفاظ جو قرآنِ حکیم کے حفظ کے ساتھ ساتھ اس کی ترتیب اور آیات کے حوالوں پر مکمل مہارت رکھتے ہیں، کو انعامات سے نواز ا۔تقریب میں وزیرِ اعظم نے خوبصورت اور منفرد لہجوں میں تلاوتِ قرآن پاک کرنے والے قارئین کی بھی انعامات سے پذیرائی کی۔
