(صباح نیوز) وفاقی دارالحکومت اسلام آباد سمیت ملک بھرمیں لاکھوں فرزندان اسلام رضائے الہی حاصل کرنے کے لیے نماز مغرب سے قبل مساجد میں اعتکاف میں بیٹھ گئے۔اسلام آباد میں فیصل مسجد لاہور میں بادشاہی مسجد سمیت کئی اہم مساجد میں اجتماعی اعتکاف میں بیٹھ گئے۔ پیشگی پہلے سے رجسٹریشن کروائی گئی تھی اجتماعی اعتکاف کے دوران معتکفین کیلیے درس قرآن وحدیث اور شرعی مسائل سے آگاہی کیلیے تربیتی نشستوں کا بھی اہتمام ہوگا۔لاکھوں فرزندان توحید رمضان المبارک کے آخری عشرے میں اعتکاف کی سعادت حاصل کرتے اور شوال کا چاند نظر آنے تک مساجد میں قیام کرتے ہیں۔
یہ عبادت فرض کفایہ کا درجہ رکھتی ہے، جو کسی بھی آبادی میں ایک فرد کے کرنے سے پورے محلے کا فرض ادا ہوجاتا ہے۔اعتکاف کی عبادت جہاں روح کی پاکیزگی کا باعث ہے وہیں خوش نصیبوں کو لیلتہ القدر بھی مل جاتی ہے۔ معتکفین ماہ مبارک کے آخری عشرے کی طاق راتوں میں خالق کائنات کے حضور اپنی مناجات و حاجات پیش کریں گے۔ہر مسجد کی انتظامیہ نے اعتکاف میں بیٹھنے والوں کے لیے بھرپور تیاریاں مکمل کی تھیں۔ بعض مساجد میں انتظامیہ اور مخیر حضرات کی جانب سے معتکفین کو سحری اور افطاری بھی فراہم کی جا رہی ہے ۔یا درہے کہ فیصل مسجد میں اعتکاف کے لئے کچھ ہفتے قبل رجسڑیشن مکمل ہوگئی تھی فیصل مسجد میں بڑی تعداد میں لوگ اعتکاف کے لئے بیٹھے ہیں اور انھیں دینی تربیت کیساتھ افطار و سحر بھی مہیا کیا جائے گا ۔
