اسلام آباد(صباح نیوز)سینیٹر اعظم سواتی کی متنازع ٹویٹس کیس میں ضمانت کی درخواست پر سماعت ایک بار پھر ملتوی کردی گئی۔
اعظم سواتی ضمانت کیس کی سماعت نئے تعینات ہونے والے سپیشل جج سینٹرل اعظم خان نے کی جس دوران اعظم سواتی کی ضمانت کی درخواست پر دوبارہ دلائل کا آغاز کیا گیا۔
اعظم سواتی کی ضمانت کی درخواست پر وکیل بابر اعوان کے دلائل مکمل کرتے ہوئے بتایا کہ مقدمہ کے مدعی متاثرہ فریق نہیں ، مقدمہ ایف آئی اے کی جانب سے درج کیا گیا تھا جبکہ توہین کا معاملہ بنتا ہی نہیں اور زیادہ سے زیادہ توہین کے معاملے میں ہزار روپے جرمانہ بنتا ہے۔
انہوں نے بتایا کہ75 سالہ شہری کو دو صوبوں میں گھماتے رہے تاہم سپیشل پراسیکیوٹر راجہ رضوان عباسی کل دلائل دینگے۔
بعدازاں سپیشل جج سینٹرل کی عدالت میں اعظم سواتی ضمانت کی درخواست پر سماعت آج(منگل) تک ملتوی کردی گئی ۔
