اسلام آباد(صباح نیوز) وزیراعظم شہباز شریف کی دعوت پر تاجکستان کے صدر امام علی رحمن کل دوزہ دورے پر پاکستان پہنچیں گے۔
ترجمان دفتر خارجہ کی جانب سے جاری پریس ریلیز کے مطابق تاجکستان کے صدر ، وزیراعظم شہباز شریف کی دعوت پر دو روزہ دورے پر پاکستان آرہے ہیں۔پاکستان اور تاجکستان دیرینہ تاریخی، ثقافتی اور مذہبی رشتوں کے ذریعے جڑے ہوئے ہیں۔دونوں ممالک کے درمیان باہمی احترام اور غیر معمولی ہم آہنگی پائی جاتی ہے۔
ترجمان دفتر خارجہ کا کہنا ہے کہ پاکستان اور تاجکستان کے درمیان مختلف علاقائی اور بین الاقوامی مسائل پر خیالات یکساں ہیں۔وسطی ایشیا میں تاجکستان پاکستان کا قریبی ہمسایہ ملک ہے، دونوں ممالک کے درمیان محض واخان راہداری واقع ہے، یہ قربت تاجکستان کو وسطی ایشیا میں پاکستان کا ایک اہم شراکت دار بناتی ہے۔
بیان میں بتایا گیا کہ دو روزہ دورے کے دوران تجارت، سرمایہ کاری، توانائی،علاقائی رابطوں پر تبادلہ خیال ہوگا اور کئی دوطرفہ معاہدوں اور مفاہمت پر دستخط کیے جائیں گے۔
ترجمان دفتر خارجہ کا کہنا ہے کہ توقع ہے کہ تاجک صدر کے دورہ پاکستان سے دونوں ممالک کے درمیان مختلف شعبوں میں تعاون اور بڑھتی ہوئی جیو اکنامک پارٹنرشپ کو مزید تقویت ملے گی۔
