کراچی(صباح نیوز)پاکستان تحریک انصاف سندھ کے صدر علی حیدر زیدی نے کہا ہے کہ اسحاق ڈار اور انکے کرپٹ بیٹے اب بانڈز کی جوڑ توڑ میں مصروف ہیں۔
سابق وفاقی وزیر علی زیدی نے اپنے جاری کردہ بیان میں کہا کہ مفتاح اسماعیل نے گزشتہ روز واقعی حقائق بیان کئے لیکن اپنے خلاف، جب آپ کو معلوم تھا کہ آپ زیادہ عرصہ اس کرسی پر نہیں ہونگے اس لئے مارکیٹ میں اندرونی سودا بازی ہوتی رہی۔
انہوں نے کہا کہ آئی ایم ایف کا موقف درست تھا کہ ایک بار جب آپ کو پیسہ مل جائے گا تو آپ حکمت عملی بدلیں گے، یہ کوئی تعجب کی بات نہیں کہ دنیا اپنی امدادی رقم سے آپ پر بھروسہ نہیں کرتی ہے۔
علی زیدی نے کہا کہ آپ نے اپنے ہی لوگوں پر آئی ایم ایف کو فوقیت دی، ایندھن کی قیمتوں میں اضافہ کرتے ہوئے انہیں غربت کی طرف دھکیل دیا۔
انہوں نے کہا کہ مفتاح اسماعیل کی ٹویٹس ڈار کو شرمندہ کرنے کے لئے نہیں ہیں، ان ٹویٹس سے کرسی چھن جانے پر انتقام کی بو آتی ہے، خبر یہ ہے کہ ڈار اور ان کے کرپٹ بیٹے اب بانڈز کی جوڑ توڑ میں مصروف ہیں، مفتاح اسماعیل کو سب کے خلاف گالی گلوچ کرنے کے بجائے خود چند سوالوں کا جواب دینا چاہیے، آپ نے دس کارگوز 900 ملین ڈالر میں خریدے، اس خریداری کا کرنٹ اکائونٹ بیلنس اور بجلی کی قیمتوں پر کیا اثر ہوا؟ 900 ملین ڈالر گیس کی خریداری پر کتنی وصولی ہوئی؟ آپ نے وہی کیا جو ایک معاشی ہٹ مین کسی ملک کے ساتھ کرتا ہے۔
علی زیدی نے کہا کہ مفتاح اسماعیل نے قلم کی ضرب سے معیشت کو مفلوج کیا، مارکیٹ مفتاح اسماعیل اور ان کے دوستوں کی طرف سے کی جانے والی روپے اور ڈالر کی اندرونی ٹریڈنگ سے اچھی طرح واقف ہے، مفتاح اسماعیل کی مداخلت سے سٹیٹ بینک کے ذریعے بہت ساری چھوٹ دی گئیں، مفتاح اسماعیل نے اسحاق ڈار کے لئے کرسی تیار کرنے کا کام کیا۔
پی ٹی آئی رہنما نے کہا کہ اسحاق ڈار کا کہنا تھا کہ ان کی وجہ سے ڈالر میں دس روپے کی کمی ہوئی اور اس سے پاکستان کو 1200 بلین روپے کی بچت ہوئی ہے، اسی فارمولے سے مفتاح کے دور میں ہم نے ڈالر 70 روپے مہنگا ہوا، اس کا مطلب ہے کہ مفتاح نے قوم کو 8400 ارب روپے کا مالی نقصان پہنچایا؟۔
انہوں نے کہا کہ مفتاح اسماعیل کا ایف ایم یو کی طرف سے ان کے خلاف جاری ایس ٹی آر کے بارے میں کیا خیال ہے؟ ویسے مفتاح افغانستان کو کتنی لالی پاپ اور کینڈی برآمد کرتے ہیں؟۔
علی زیدی نے کہا کہ مفتاح کا واقعی سکول میں دوستوں نے بہت مذاق اڑایا ہوگا اس لئے یہ ہر وقت روتے ہیں، رونا بند کرو اور ایک مرد کی طرح حالات کا مقابلہ کرو، میرے دوست!۔
