لاہور(صباح نیوز) پاکستان بزنس فورم(ویمن ونگ)کی چیئرپرسن عائشہ فاروقی نے کہا ہے کہ کسی بھی ملک کی معاشی ترقی خواتین کی شمولیت کے بغیر ناممکن ہے ،خواتین کی شمولیت سے ملکی آمدنی میں 25 فیصد اضافہ ہو سکتا ہے،خواتین کی قیادت ملک کی ترقی اور خوشحالی میں کلیدی کردار ادا کر سکتی ہے، لندن میں مریم اورنگزیب کو ہراساں کرنے کی مذمت کرتے ہیں، یہ لوگ گھٹیا سوچ کے شکار ہیں،سیاسی پولرائزیشن کی حالت اپنے عروج پر ہے۔
عائشہ فاروقی نے پیر کو یہاںپائیدار ترقی کے اہداف کے حصول پر سیمینار سے خطاب کرتے ہوئے ایک قانونی ڈھانچہ تیار کرنے اور خواتین کو لیبر فورس میں ان کی شرکت کو مضبوط بنانے کی حوصلہ افزائی کے لیے سازگار ماحول پیدا کرنے کی اہمیت پر روشنی ڈالی۔ انہوں نے کہا کہ کوئی بھی ملک اس وقت تک آگے نہیں بڑھ سکتا جب تک کہ خواتین معاشی ترقی میں اپنا حصہ نہ ڈالیں۔
انہوں نے کہا کہ ہمیں صحیح قسم کی قانون سازی کرنی ہوگی تاکہ اس قسم کے امتیازات کو ختم کیا جائے یا غیر قانونی قرار دیا جائے اور ان پر عمل نہ کیا جا سکے۔ عائشہ فاروقی نے کہا کہ قانونی ڈھانچہ طے کرنا سیڑھی پر صرف ایک قدم تھا، انہوں نے مزید کہا کہ ایسا ماحول پیدا کرنا جو خواتین کو لیبر فورس میں آنے اور حصہ لینے کی تحریک دے، دوسرا اہم قدم ہے۔ انہوں نے مزید کہا کہ آپ کو لیبر فورس میں حصہ لیتے ہوئے اور کام کرتے ہوئے انہیں محفوظ محسوس کرنا ہوگا۔ انہوں نے کہا کہ خواتین کی شمولیت سے ملکی آمدنی میں 25 فیصد اضافہ ہو سکتا ہے اور خواتین کی قیادت ملک کی ترقی اور خوشحالی میں کلیدی کردار ادا کر سکتی ہے۔
عائشہ فاروقی نے کہا کہ اگرچہ اس وقت پاکستان صنفی ترقی کے اشاریہ یا صنفی مساوات کے اشاریہ میں بین الاقوامی سطح پر بہت اوپر نہیں ہے تاہم لیبر میں خواتین کی شرکت کا رجحان بڑ ھا ہے اور پاکستانی خواتین ان علاقوں میں آ ئیں جہاں روایتی طور پر مردوں کا غلبہ تھا۔ عائشہ فاروقی نے لندن میں وفاقی وزیر اطلاعات مریم اورنگزیب کو ہراساں کرنے کی بھی مذمت کی، یہ لوگ گھٹیا سوچ کے شکار ہیں،سیاسی پولرائزیشن کی حالت اپنے عروج پر ہے۔ مریم اورنگزیب نے اپنے پرسکون اور باوقار طرز عمل سے ہراساں کرنے والوں کا بدصورت چہرہ بے نقاب کر دیا۔ چیئرپرسن پی بی ایف نے مطالبہ کیا کہ یہ معاملہ برطانیہ کے محکمہ داخلہ کے سامنے احتجاجا اٹھایا جائے۔
