لاہور(صباح نیوز) پاکستان تحریک انصاف کے رہنماوں نے کہاہے کہ حکومت کی نااہلی عروج پر ہے، آج سیاسی میدان میں بے شرمی کی انتہا ہو چکی ہے، عمران خان نے فریش مینڈیٹ کیلئے دوٹوک کہا ہے،حکومت انتخابات کی طرف جانا ہی نہیں چاہتی ، انہیں پتہ ہے کہ بات الیکشن پر گئی تو عوام نے انہیں ووٹ نہیں دینا ، حکومت کے نکمے پن کے باعث عوام مہنگائی کی چکی میں پس رہے ہیں۔
لاہور میں پی ٹی آئی کے رہنماؤں شوکت ترین اور جمشید اقبال کے ہمراہ پریس کانفرنس کرتے ہوئے حماد اظہر نے کہا کہ پی ٹی آئی شہری حقوق دلوانے کی جنگ لڑ رہی ہے ، آگے بہت زیادہ بیروزگاری آ رہی ہے ۔حماد اظہر کا کہنا تھا کہ ڈیفالٹ سے بچانے کا نعرہ لگانے والے جھوٹ بول رہے ہیں ، حکومت انتخابات کی طرف جانا ہی نہیں چاہتی ، انہیں پتہ ہے کہ بات الیکشن پر گئی تو عوام نے انہیں ووٹ نہیں دینا ۔عالمی منڈی میں قیمتیں جتنی بھی نیچے چلی جائیں یہاں کم نہیں ہو سکتیں، عوام آج اِن کی نالائقی کا خمیازہ بھگت رہی ہے، اگلے مہینے کے بجلی یونٹ میں 10روپے اضافی ہوں گے جبکہ بجلی ہے ہی نہیں، آتی ہے تو بہت مہنگی ہوتی ہے ۔
پی ٹی آئی رہنما شوکت ترین نے کہا کہ عمران خان نے فریش مینڈیٹ کیلئے دوٹوک کہا ہے، اس مقصد کیلئے بات چیت کیلئے ہم تیار ہیں، سیاسی عدم استحکام ختم کرنے کیلئے الیکشن کے معاملے پر بات ہونی چاہیے۔شوکت ترین کا کہنا تھا کہ سب سے پہلے عبوری حکومت لے کر آئیں، ہم بات کرنے کیلئے تیار ہیں،میں نگراں حکومت کی مدد کیلئے بھی تیار ہوں، مگر ضروری ہے کہ ایک غیر جانبدار عبوری حکومت لائی جائے ۔
شوکت ترین کا مزید کہنا تھا کہ الیکشن اصلاحات پر بھی بات کی جا سکتی ہے،عبوری حکومت ایسی ہونی چاہیے جس پر سب کا اعتماد ہو۔اس موقع پر موجود پی ٹی آئی رہنما جمشید اقبال نے کہا کہ زراعت کو سیلاب نے بہت زیادہ نقصان پہنچایا ہے ، سندھ میں کپاس اور چاول کی فصل کو بہت نقصان پہنچا ہے۔
