اسلام آباد(صباح نیوز) چیئرمین سینیٹ محمد صادق سنجرانی نے عیدالاضحی کے موقع پر قوم اور پوری مسلم امہ کو دلی مبارک باد پیش کرتے ہوئے کہا ہے کہ اس مقدس اسلامی تہوار کے حقیقی درس کو سمجھنے کی اہمیت موجودہ دور میں بڑھ گئی ہے۔عید الاضحی قربانی،ایثار اور احساس کے جذبے کو فروغ دینے کا نام ہے۔ عید الا ضحی حضرت ابراہیم علیہ السلام کی اطاعت خداوندی اور حضر ت اسماعیل علیہ السلام کی تسلیم و رضا کی شاندار مثال اور یادگار ہے جس نے اطاعت اور قربانی کی ایک ایسی لازوال راویت قائم کی جو تاقیامت جاری رہے گی۔
انہوں نے کہا کہ ہمیں سماجی و اقتصادی سطح پر جن مسائل کا سامنا ہے ان کامقابلہ کرنے کے لئے ہمیں اپنی صفوں میں اتحاد پیدا کرنا ہوگا اور ہمیں اپنے تمام تر مفادات، ترجیحات اور تعصبات کو پس پشت رکھتے ہوئے ملک و قوم کی ترقی و خوشحالی اور اجتماعی فلاح و بہبود کے لئے مل کر کام کرنا ہوگا۔ عید الاضحی کی خوشیاں مناتے ہوئے اپنے ان بہن بھائیوں کو بھی نہ بھولیں جو معاشی طور پر بہت پیچھے رہ گئے ہوں۔ آج کے دن ہمیں وطن کے ان معماروں اور محافظوں کو بھی یاد رکھنا ہے جنہوں نے وطنِ عزیز کی حفاظت، تعمیر و ترقی اور سربلندی جیسے عظیم مقصد کے لئے اپنی جانیں قربان کی ہیں۔
میں اللہ تعالی سے دعا گوہ ہوں کہ وہ ہمیں عید الاضحی کی حقیقی خوشیوں سے ہمکنار کریں اور ہماری قربانی کو شرف قبولیت بخشیں اور ہمیں اِس عظیم عبادت کو اس کی روح کے مطابق سمجھ کر عمل کرنے کی توفیق عطا فرمائے۔ آمین ڈپٹی چیئرمین سینیٹ مرزا محمد آفریدی نے بھی قوم کو عید الاضحی کے پر مسرت موقع پر مبارکباد پیش کرتے ہوئے اللہ تبارک تعالی سے دعا کی ہے کہ تمام مسلمانوں کی عید الاضحی کے مقدس موقع پر دی جانے والی قربانیوں کو قبول فرمائیں۔
مرزا محمد آفریدی نے کہا کہ عید کی خوشیاں مناتے وقت ہمیں اپنے عزیز و اقارب، پڑوسیوں اور غریب و نادار افراد کا خیال رکھتے ہوئے ایسے اقدامات اٹھائیں کہ وہ لوگ بھی عید کی خوشیوں سے لطف اندوز ہو سکیں۔قائد ایوان سینیٹ سینیٹر اعظم نذیر تارڑ، قائد حزب اختلاف سینیٹ سینیٹر ڈاکٹر شہزاد وسیم نے بھی قوم کو عید کے موقع پر دلی مبارکباد پیش کرتے ہوئے اللہ تعالی سے دعا کی کہ اقوام عالم کو درپیش مسائل سے جلد از جلد نجات مل سکے۔
