راولپنڈی (صباح نیوز)شمالی وزیرستان میں سرحد پارافغانستان سے دہشتگردوں کی فائرنگ کے باعث پاک فوج کے3 جوان شہید ہو گئے۔
پاک فوج کے شعبہ تعلقات عامہ( آئی ایس پی آر)کی جانب سے جاری بیان کے مطابق پاک فوج کے شعبہ تعلقات عامہ آئی ایس پی آر کے مطابق بین الاقوامی سرحد کے اس پار افغانستان کے اندر سے دہشت گردوں نے شمالی وزیرستان کے ضلع دیواگر کے علاقے میں فوج کے جوانوں پر فائرنگ کی جس کے نتیجے میں پاک فوج کے 3 جوان شہید ہو گئے۔شہید ہونے والے جوانوں میں 30سالہ حوالدار تیمور ،38سالہ نائیک شعیب اور24سالہ سپاہی ثاقب نواز شامل ہیں۔
آئی ایس پی آر کے مطابق حوالدار تیمور کا تعلق جہلم، نائیک شعیب کا تعلق اٹک اور سپاہی ثاقب نواز کا تعلق سیالکوٹ سے ہے۔ آئی ایس پی آر کے مطابق پاک فوج کے جوانوں نے بھر پور جوابی کارروائی کرتے ہوئے دہشت گردوں کو بھاری جانی نقصان پہنچایا ۔
آئی ایس پی آر کے مطابق پاکستان دہشت گردوں کی جانب سے افغان سرزمین استعمال کرنے کی شدید الفاظ میں مذمت کرتا ہے ۔توقع ہے کہ افغان حکومت مستقبل میں ایسی سرگرمیوں کی اجازت نہیں دے گی اور اپنی سرزمین پاکستان کے خلاف استعمال نہیں کرنے دے گی۔ پاک فوج دہشت گردی کی لعنت کے خاتمہ اور ملکی سرحدوں کے دفاع کے لئے پُرعزم ہے۔ ہمارے بہادر جوانوں کی قربانیاں ہمارے عزم کو مزید مضبوط کرتی ہیںاور جوانوں کی یہ قربانیاں رائیگاں نہیں جائیں گی۔
بلاول بھٹو زرداری کا شمالی وزیرستان میں فوجی جوانوں کی شہادت پر اظہار افسوس
پاکستان پیپلز پارٹی کے چیئرمین بلاول بھٹو زرداری نے شمالی وزیرستان میں پاک افغان بارڈر پر سرحد پار سے دہشتگردوں کی فائرنگ کی مذمت کرتے ہوئے پاک فوج کے تین جوانوں کی شہادت پر افسوس کا اظہار کیا ہے۔
سوشل میڈیا پر جاری اپنے بیان میں بلاول بھٹو زرداری کا کہنا تھا کہ جام شہادت نوش کرنے والے حوالدار تیمور، نائیک شعیب اور سپاہی ثاقب نواز کو سلام۔خون کی ہولی کھیلنے والوں کو حساب دینا پڑے گا۔
بلاول بھٹو زرداری نے کہا کہ پوری قوم دہشتگردوں کو نیشنل ایکشن پلان کے تحت آہنی ہاتھوں سے کچلنے کی حامی ہے جبکہ بلاول بھٹو زرداری نے شہدا ء کے لواحقین سے دلی تعزیت اور یکجہتی کا اظہار بھی کیا ہے۔
