سری نگر— کل جماعتی حریت کانفرنس نے اقوام متحدہ سے اپیل کی ہے کہ وہ تنازعہ کشمیر کے حل کے لیے فوری اقدامات کرے۔
کل جماعتی حریت کانفرنس کے ترجمان ایڈوکیٹ عبدالرشید منہاس نے سرینگر میں جاری ایک بیان میںمقبوضہ جموں و کشمیر میں جاری انسانی حقوق کے بحران کا حوالہ دیتے ہوئے مطالبہ کیا کہ نیویارک میں جاری اقوام متحدہ کی جنرل اسمبلی کے 79ویں اجلاس میں اس مسئلے پر فوری توجہ دی جائے۔انہوں نے کہاکہ اقوام متحدہ کی اخلاقی اور قانونی ذمہ داری ہے کہ وہ تنازعہ کشمیر کو اپنی منظورشدہ قراردادوں اور کشمیری عوام کی امنگوں کے مطابق حل کرائے۔
انہوں نے مقبوضہ جموں وکشمیر میں آبادی کاتناسب تبدیل کرنے اور کشمیریوں کی شناخت مٹانے کی بھارت کی کوششوں کی مذمت کی۔ترجمان نے خبردار کیا کہ عالمی ادارے کی جانب سے مزید بے عملی مودی حکومت کے جبر کو مزید ہوا دے گی اورمقبوضہ جموں و کشمیر میں جاری قتل و غارت میں اضافے کا باعث بنے گی۔ انہوں نے کہا کہ جنوبی ایشیا میں امن کا انحصار مسئلہ کشمیر کو اقوام متحدہ کی قراردادوں کے مطابق حل کرنے پر ہے۔
انہوں نے دنیا پر زور دیا کہ وہ مودی اور بھارتی فوجیوں کو مقبوضہ جموں وکشمیرمیں انسانیت کے خلاف جرائم پر جوابدہ بنائے۔ انہوں نے اقوام متحدہ سے مطالبہ کیاکہ وہ کشمیریوں کو بھارتی جارحیت سے بچائے۔
