لاہور(صباح نیوز)کاؤنٹر ٹیررازم ڈیپارٹمنٹ(سی ٹی ڈی)نے پنجاب کے مختلف اضلاع میں کارروائیوں کے دوران 44 دہشت گردوں کو گرفتارکر لیا جبکہ دہشت گردوں سے بھاری مقدار میں بارودی مواد اور اسلحہ بھی برآمد کیا گیا۔
سی ٹی ڈی کی جانب سے کارروائیاں لاہور، راولپنڈی، گوجرانوالہ، فیصل آباد، نارووال اور سیالکوٹ میں کی گئیں، اس کے علاوہ خانیوال، منڈی بہاؤالدین، جھنگ، رحیم یار خان اور بہاولپور میں بھی آپریشنز کئے گئے۔ترجمان سی ٹی ڈی کے مطابق کارروائی کے دوران لاہور سے ٹی ٹی پی کے 2خطرناک دہشت گرد گرفتار کرلئے گئے، دہشت گردوں سے دھماکا خیز مواد، جیکٹ، ہینڈ گرنیڈ اور 37ڈیٹونیٹر برآمد ہوئے۔ ترجمان نے بتایا کہ دہشت گردوں کی شناخت محمد خان، عبدالرف، حبیب اللہ، محمد شہزاد اور حمایت اللہ کے نام سے ہوئی ہے، گرفتار ہونے والوں میں اسامہ، عظیم، طارق خان، تنویر احمد، احسن اور دیگر شامل ہیں۔ ترجمان سی ٹی ڈی نے بتایا کہ دہشت گرد مختلف مقامات پر حملے کی منصوبہ بندی کر رہے تھے، مئی میں 2738کومبنگ آپریشنز کے دوران 673مشتبہ افراد گرفتار کیے گئے، کومبنگ آپریشنز میں 96ہزار 796افراد سے پوچھ گچھ کی گئی۔
