اسلام آباد(صباح نیوز)وفاقی وزیر خزانہ سینیٹر محمد اسحاق ڈار نے کہا ہے کہ مشکل معاشی صورتحال کے باوجود حکومت ملکی معیشت کے استحکام اور ترقی کی جانب گامزن ہے۔
ان خیالات کا اظہار انہوں نے جے پی مورگن دبئی کے عمران زیدی کی قیادت میں عالمی شہرت یافتہ سرمایہ کار کمپنیوں کے نمائندوں پر مشتمل وفد سے فنانس ڈویژن میں ملاقات کے دوران کیا۔وزیراعظم کے معاون خصوصی طارق باجوہ، وزیراعظم کے معاون خصوصی برائے ریونیو طارق پاشا، سیکرٹری فنانس، اور فنانس ڈویژن کے سینئر افسران بھی اس موقع پر موجود تھے۔ وفد نے ملک کی معاشی صورتحال اور آٹ لک پر تبادلہ خیال کیا۔ وفد نے وزیر خزانہ کے ساتھ آئی ایم ایف پروگرام، مارکیٹ پرسیپشن اور آٹ لک کے ساتھ ساتھ بیرونی کھاتوں کی صورتحال کے حوالے سے بھی جامع تبادلہ خیال کیا ۔وزیر خزانہ سینیٹر محمد اسحاق ڈار نے وفد کو خوش آمدید کہا اور ملک کے معاشی نقطہ نظر سے آگاہ کیا اور کہا کہ مشکل معاشی صورتحال کے باوجود حکومت ملکی معیشت کو استحکام اور ترقی کی جانب گامزن کر رہی ہے۔
انہوں نے یہ بھی بتایا کہ پاکستان آہستہ آہستہ لیکن یقینی طور پر معاشی استحکام کی طرف بڑھ رہا ہے اور یہ وقت پاکستان میں سرمایہ کاری کا ہے۔انہوں نے بتایا کہ بطور وزیر خزانہ انہوں نے ماضی میں آئی ایم ایف پروگرام کو کامیابی سے مکمل کیا ہے اور موجودہ حکومت موجودہ پروگرام کو مکمل کرنے اور تمام بین الاقوامی ذمہ داریوں کو پورا کرنے کے لئے پرعزم ہے۔ جے پی مورگن کے عمران زیدی نے وزیر خزانہ کو کمپنی کے پروفائل اور دنیا کے مختلف ممالک کو فراہم کی جانے والی اس کی مالیاتی خدمات کے بارے میں آگاہ کیا۔
وفد نے حکومت کی جانب سے مالیاتی اور مالیاتی استحکام کو برقرار رکھنے اور بڑھانے کے لئے کئے گئے پالیسی اقدامات کو سراہا اور پائیدار اقتصادی ترقی کے حصول پر اعتماد کا اظہار کیا۔ وزیر خزانہ سینیٹر اسحاق ڈار نے پاکستان کی معاشی خوشحالی کے لئے وفد کے مثبت ارادوں کو سراہا۔۔
