برسلز:مقبوضہ جموں و کشمیر کے مظلوم عوام کے ساتھ اظہار یکجہتی کے لیے بیلجیئم کے دارالحکومت برسلز میں کل ایک مشعل بردار جلوس کا انعقاد کیا جائے گا۔مشعل بردار جلوس کا اہتمام کشمیر کونسل یورپ (کے سی ای یو) نے کیا ہے ۔
کے سی ای یو نے برسلز میں جاری ایک بیان میں کہا کہ پروگرام کا اہتمام کل شام 4 بجے یورپی یونین کے ہیڈ کوارٹر برسلز میں سینٹرل سٹیشن کے سامنے یورپی اسکوائر پر کیا جائے گا۔ بیان میں کہا گیا کہ اس موقع پر بھارتی ریاست گجرات میں مسلمانوں کے قتل عام کے بارے میں بی بی سی کی دستاویزی فلم کے علاوہ جموں و کشمیر کے لوگوں پر بھارتی مظالم کے حوالے س بھی ایک فلم دکھائی جائے گی۔
کے سی ای یو کے چیئرمین علی رضا سید نے اپنے بیان مقبوضہ جموں وکشمیر میں بھارتی فوجیوں کی طرف سے ڈھائے جانے والے مظالم کی مذمت کرتے ہوئے حق خودارادیت کے لیے جدوجہد کرنے والے کشمیر کے بہادر لوگوں کو زبردست خراج تحسین پیش کیا۔علی رضا سید نے کہا کہ ہم تنازعہ کشمیر کے مناسب حل تک کشمیری عوام کی حمایت جاری رکھیں گے۔
انہوں نے کہا کہ مقبوضہ جموں وکشمیر میں لاکھوں بھارتی فوجیوں کی تعیناتی بھارتی سفاکانہ قبضے کا منہ بولتا ثبوت ہے ۔انہوں نے اقوام متحدہ اور یورپی یونین سے مطالبہ کیا کہ وہ تنازعہ کشمیر کے پرامن حل کے لیے اپنا کردار ادا کریں۔
