ڈیر ہ اسماعیل خان( صباح نیوز) تھانہ صدر کی حدود ڈیرہ ٹانک روڈ پر لنک روڈ گرہ حیات کے قریب ٹریفک کے المناک حادثہ میں باپ بیٹے اور خاتون سمیت3 افراد جاں بحق،25سے زائد افرادزخمی، متعددزخمیوں کی حالت تشویشناک،ریسکیو1122کی میڈیکل ٹیموں نے زخمیوں کو ہسپتال منتقل کردیا، حادثہ کا شکارہونیوالی بدقسمت کار کے سوارشادی کی تقریب میں شرکت کیلئے ڈیرہ سے ٹانک جارہے تھے۔
تفصیلات کے مطابق تھانہ صدر کی حدود ڈیرہ ٹانک روڈ پر شہ زور مزدا ٹرک کے مابین خوفناک تصادم میں 3افراد 59 سالہ مولانا شیر افضل بیٹنی، ان کا 7سالہ بچہ یونس بیٹنی اور قریبی رشتہ دار خاتون 17سالہ شادینہ بی بی دختر سعداللہ بیٹنی سکنہ عمر اڈا ٹانک حال قریشی موڑ ڈیرہ اسماعیل خان موقع پر ہی دم توڑ گئے جبکہ دونوں گاڑیوں کے ڈرائیوروں سمیت25سے زائد افرادجن میں مزدا گاڑی میں سوار جمعہ خان، گل زمان، ندیم، محبوب، غلام محی الدین، رمضان، اسماعیل، حسن، اللہ بخش، اسحق، نجم گل،مہربان، نعمان،نوید سکنائے کوٹ عیسیٰ خان اور موٹر کار میں سوار11سالہ عمیر بیٹنی ولد مولانا شیر افضل، 13سالہ سائرہ بانو دختر زخمی ہوگئے۔
حادثہ کی اطلاع ملتے ہی مقامی پولیس ریسکیو1122کی میڈیکل ٹیمیں جائے حادثہ پر پہنچ گئیں اور زخمیوں کو ابتدا ئی طبی امداد فراہمی کے بعد ہسپتال منتقل کردیا ، زخمیوں میںسے متعددافراد کی حالت تشویشناک بتائی جاتی ہے۔
ریسکیو 1122کے ترجمان کی رپورٹ کے مطابق جاں بحق ہونے والے افراد میں 1کمسن بچی اور خاتون بھی شامل ہے جبکہ جاں بحق افراد میں مقامی عالم دین بھی شامل ہے ، مزدا ٹرک میں سوار افراد مقامی مزدور بتائے جاتے ہیں جو کہ مزدوری کیلئے ڈیرہ اسماعیل خان آرہے تھے۔
پولیس ذرائع کے مطابق بدقسمت کار سوار شادی کی تقریب میں شرکت کیلئے ڈیرہ سے ٹانک جارہے تھے۔ حادثہ اس قدر شدید بتایا جاتا ہے کہ دونوں گاڑیاں مکمل طور پر تباہ ہوگئیں۔
