شکاگو(صباح نیوز) امریکہ میںمقیم پاکستانیوں نے پاکستانی امریکن چیمبر آف کامرس قائم کرلیاہے،جس کا مقصدپاکستان اور امریکہ کے درمیان اقتصادی اور سرمایہ کاری کی سرگرمیوں کو فروغ دینااور تاجروں کے مسائل اجاگرکرکے انہیں فوری طور پرحل کرانے کی کوششیں کرناہے۔اس سلسلے میں شکاگومیں ایک تقریب منعقدہوئی جس میں معروف بزنس مین نوید انورچوہدری کو پاکستانی امریکن چیمبرآف کامرس کا صدر اور طارق بٹ کوچیئرمین بنایاگیااوران پر اعتماد کا اظہار کیاگیا۔
تقریب میں پاکستان کے قونصل جنرل طارق کریم،امریکہ کی اہم شخصیات انا والنسیا، میلیسا ایرون، فرٹز کیگی، ڈینی ڈیوس کے علاوہ معروف پاکستانیوں راناجاوید،رانازاہد،رضوان خان،چوہدری منیر،ڈاکٹرمحمدانور،آصف ملک اور ڈاکٹرآصف سمیت بڑی تعدادمیںپاکستانیوںنے شرکت ۔تقریب سے خطاب کرتے ہوئے نویدانورچوہدری نے کہاکہ انہیںاس بات کی خوشی ہے کہ ہم چیمبرآف کامرس کے قیام میں کامیاب ہوئے ہیں اور اس کا سہراطارق بٹ، قونصل جنرل، کمیونٹی لیڈرز اورتاجروں کو جاتاہے۔
انہوں نے کہاکہ یہاںبیٹھے ہوئے تمام افراد کاتعلق مختلف صنعتوں سے ہے لیکن اس سے پہلے ہمارے پاس کوئی باضابطہ فورم موجود نہیں تھاجہاںہم اپنی تجاویزدے سکیں،دونوں ممالک کے درمیان اقتصادی سرگرمیوں کو مزید فروغ دینیکی ضرورت ہے اور اس سلسلے میں یہ چیمبراپنافعال کرداراداکرے گا۔ تجارت اور سرمایہ کاری کو بڑھایاجاسکتاہے اور اس کے وسیع مواقع موجود ہیں۔انہوں نے کہاکہ اس فورم کے ذریعے امپورٹ ،ایکسپورٹ میںجو بھی ایشوز آتے ہیں انہیں اجاگرکرنے میں مدد ملے گی اور دونوں ممالک کی حکومتوںکے ساتھ رابطوں کو فروغ دیاجائے گا۔
اس موقع پر شرکانے چیمبر آف کامرس کے قیام کاخیرمقدم کرتے ہوئے اس توقع کااظہارکیاکہ نہ صرف اقتصادی شعبے میں دونوںممالک میںتعاون بڑھے گابلکہ دونوںممالک کے تاجروں کو جن مسائل کاسامناکرناپڑتاہے انہیںحل کرانے میںآسانی ہوگی۔انہوں نے کہاکہ کوئی نہیں جانتا کہ اگر ہم دونوں ممالک خصوصا امریکہ اور پاکستان کے درمیان تجارت کرتے ہیں تو ٹیرف کیا ہوگا کیونکہ ہم سب کو ان مسائل کا سامنا ہے، اگرچہ بعض اوقات یہ ایک چھوٹا مسئلہ ہوتا ہے لیکن ہم تجارت نہیں کر سکتے۔نویدانور کامزید کہناتھا کہ مجھے امید ہے کہ اس فورم اور اس چیمبر آف کامرس کے ساتھ، ہم ان چیزوں کو حل کرنے میں کامیاب ہوں گے، اور ہم آگے بڑھیں گے، جس سے دونوں ممالک کے درمیان مزید اقتصادی سرگرمیاں ہوسکیں گی
