اسلام آباد(صبا ح نیوز)ملک بھر کے 15 اضلاع اسلام آباد، لاہور، ملتان، کراچی، سکھر، پشاور، لکی مروت، استور، گلگت، دیامر، کوئٹہ، قلعہ سیف اللہ، مظفرآباد، جعفرآباد اور نیلم میں پائلٹ پروجیکٹ کے تحت 150,000 بی آئی ایس پی مستحقین کے بچت اکاونٹس کھولے جائیں گے ،مستحقین کی 500 روپے سے 1000روپے ماہانہ بچت پر حکومت پاکستان کی جانب سے بی آئی ایس پی کے ذریعے سہ ماہی بنیادوں پر 40 فیصد اضافی رقم ادا کی جائے گی ،بینظیر انکم سپورٹ پروگرام( بی آئی ایس پی )اور JazzCash کے مابین معاشرے کے کم آمدنی والے طبقات میں بچت کے رجحان کو فروغ دینے کے لیے ہائبرڈ سوشل پروٹیکشن سکیم کے تحت ایک تاریخی مفاہمتی یادداشت پر دستخط کیے گئے۔
ڈائریکٹر جنرل بی آئی ایس پی ڈاکٹر عاصم اعجاز اور سی ای او جاز کیش مرتضی علی نے چیئرپرسن بی آئی ایس پی سینیٹر روبینہ خالد اور سیکرٹری عامر علی احمد کی موجودگی میں مفاہمتی یاداشت پر دستخط کئے ۔ تقریب میں ایڈیشنل سیکرٹری بی آئی ایس پی ڈاکٹر طاہر نور ، ورلڈ بینک سے امجد ظفر خان؛ اور JazzCash کے سربراہ پبلک سیکٹر پارٹنرشپس آصف چوہدری بھی موجود تھے۔اس اقدام کے تحت، اسلام آباد، لاہور، ملتان، کراچی، سکھر، پشاور، لکی مروت، استور، گلگت، دیامر، کوئٹہ، قلعہ سیف آباد، قلعہ سیف آباد، مظفر آباد ، جعفر آباد اور نیلم سمیت 15 پائلٹ پروجیکٹ کے تحت پہلے آئیے، پہلے پائیے کی بنیاد پر 150,000 BISP مستحقین کے لیے بچت اکاونٹس کھولے جائیں گے۔
چیئرپرسن بی آئی ایس پی سینیٹر روبینہ خالد نے تمام اسٹیک ہولڈرز کو مبارکباد دی اورمستحقین میں رقوم کی باعزت اور شفافیت انداز میں تقسیم کو یقینی بنانے کے اس منصوبے کو “صحیح سمت میں ایک قدم” قرار دیا۔ انہوں نے اس بات پر زور دیا کہ بینک اکانٹس کھولنے سے قدرتی آفات کے دوران بچت کی ہوئی رقم معاون ثابت گی ۔ انہوں نے کہا کہ “یہ شراکت داری ہماری مستحق خواتین کی رقوم کے حصول کو آسان بناتے ہوئے ان کی معاشی بااختیار ی میں مدد دے گی۔ اس طرح کے تجربات کے ذریعے، خواتین نہ صرف بچت کرتی ہیں بلکہ بہت کچھ نیا بھی سیکھتی ہیں۔” انہوں نے خواتین دستکاریوں کو مقامی اور بین الاقوامی منڈیوں سے منسلک کرنے کی اہمیت پر بھی زور دیا۔
اس موقع پر گفتگو کرتے ہوئے سیکرٹری بی آئی ایس پی عامر علی احمد نے کہا کہ یہ بی آئی ایس پی کی 16 سالہ تاریخ میں رقوم کی تقسیم میں پہلی ڈیجیٹل ٹرانسفارمیشن ہے۔ “JazzCash اور ورلڈ بینک کے تعاون سے، ہم اس پروجیکٹ کو شروع کر رہے ہیں، جو HSPS کے سبسکرائبرز کو ماہانہ 500 روپے یا 1,000 روپے بچت کی ترغیب دیتا ہے ۔ جس میں ہر تین ماہ بعد حکومت پاکستان کی جانب سے BISP کے ذریعے 40 فیصد اضافی رقم دی جائے گی۔JazzCash کے سی ای او مرتضی علی نے کہا کہ آج ہم غربت کے خاتمے اور مالیاتی خود انحصاری کو فروغ دینے کے مشن میں، خاص طور پر خواتین کے لیے BISP کے ساتھ اپنی شراکت داری کو مضبوط کر رہے ہیں۔ ہم مالی شمولیت کے نظام کے تحت پسماندہ کمیونٹیز کو بااختیار بنانا چاہتے ہیں ۔ ورلڈ بینک کی جانب سے امجد ظفر خان نے اس اقدام کو سراہتے ہوئے مستقبل میں اس کے مثبت اثرات کے لیے امید کا اظہار کیا۔
