اسلام آباد(صباح نیوز)ایثار ٹرسٹ اور رفاہ انٹر نیشنل یو نیورسٹی اسلام آباد کے زیر اہتمام “بنگلہ دیش پاکستان تعلقات ۔تعاون کا نیا دور کے عنوان سے سیمینار کا انعقاد کیا گیا۔ مہمان خصوصی بنگلہ دیش کے پاکستان میں تعینات ہائی کمشنر اقبال حسین خان تھے جبکہ دیگر شرکا میں رفاہ انٹر نیشنل یو نیورسٹی کے وائس چانسلر ڈاکٹر انیس احمد، ایثار ٹرسٹ کے صدر سید محمد بلال، ڈاکٹر راشد آفتاب، لیفٹیننٹ جنرل (ر) نعیم لودھی،سفیر معظم خان، نعیم انور اور دیگر شامل تھے۔
سیمینار سے خطاب کرتے ہوئے مقررین نے کہا کہ پاکستان، بنگلا دیش دو برادر اسلامی ممالک ہیں جن کے درمیان تمام دائروں میں مضبوط اور پائیدار تعلقات قائم کرنے کی اشد ضرورت ہے۔سیمینار میں قدرتی آفات کے دوران ایک دوسرے کی مدد کے لئے تھنک ٹینکس اور فنڈ قائم کرنے کی تجویز پیش کی گئی۔دونوں ممالک کے عوام بالخصوص نوجوانوں کی فلاح و بہبود کے لئے مل کر کام کر نے کی اہمیت پر زور دیا گیا۔
مقررین نے کہا کہ یہ پیشرفت ایسے وقت میں ہوئی ہے جب بنگلہ دیش اور پاکستان دہائیوں کی تاریخی کشیدگی کے بعد براہ راست پروازیں دوبارہ شروع کرنے اور سفارتی تعلقات کو مضبوط بنانے کے لئے کام کر رہے ہیں۔سیمینار کے مقررین نے دونوں ممالک میں تعلیم، تحقیق، باہمی رابطوں اور ثقافتی تبادلوں سمیت د فاعی تعاون اور علاقائی سلامتی،سفارتی تعلقات اور تعاون کے مواقع، تجارت، معیشت ، ٹیکنالوجی اور پائیدار ترقی میں تعاون کے ممکنہ شعبوں پر تبادلہ خیال کیا اور اس حوالے سے تجاویز بھی پیش کیں۔
