اسلام آباد(صباح نیوز)وزیر خارجہ مخدوم شاہ محمود قریشی نے کہاہے کہ یورپی یونین کی جانب سے پاکستان کو “جی ایس پی پلس” کی سہولت باہمی طور پر فائدہ مند رہی ہے۔جی ایس پی پلس اسٹیٹس نے دونوں فریقوں کے درمیان تجارت کے فروغ میں اہم کردار ادا کیا ہے،پاکستان اور یورپی یونین کے مابین اسٹریٹیجک انگیجمنٹ پلان کا اگلا مرحلہ، دو طرفہ تجارت کے فروغ ، پائیدار ترقی کے اہداف کے حصول ، موسمیاتی تبدیلیوں سے متعلقہ چیلنجز سے نمٹنے ،اور ڈیجیٹلائزیشن سے متعلقہ امور کے حوالے سے انتہائی اہمیت کا حامل ہے،
وزیر خارجہ یورپی یونین پارلیمنٹ کے وفد برائے جنوبی ایشیا تعلقات سے گفتگو کررہے تھے جس نے وزارتِ خارجہ میں مسٹر نکولا پروکاسینی کی قیادت میں ان سے ملاقات کی،دوران ملاقات پاکستان اور یورپی یونین کے مابین، کثیرالجہتی شعبہ جات میں دو طرفہ تعاون کے فروغ و اہم علاقائی و عالمی امور پر تبادلہ خیال ہوا،
اس موقع پر وزیر خارجہ مخدوم شاہ محمود قریشی نے کہاکہ پاکستان اور یورپی یونین کے مابین “یورپی یونین اسٹریٹجک انگیجمنٹ پلان ، دو طرفہ کثیر الجہتی تعاون بڑھانے کے لیے ایک ٹھوس بنیاد اور فریم ورک مہیا کرتا ہے،فریقین نے پاکستان اور یورپی یونین کے تعلقات کو مزید مستحکم بنانے کیلئے نتیجہ خیز اور تعمیری شراکت داری کی بنیاد پر مشترکہ کاوشیں جاری رکھنے کی ضرورت زور دیا۔
وزیر خارجہ نے کورونا وبا کے دوران، یورپی یونین کی جانب سے فراہم کردہ معاونت کو سراہا۔ملاقات میںفریقین کے مابین افغانستان کی موجودہ صورتحال پر بھی تفصیلی تبادلہ خیال ہوا ،، مخدوم شاہ محمود قریشی کا کہنا تھا کہ پاکستان، قریبی ہمسایہ ہونے کے ناطے، گذشتہ چالیس سال سے، افغانستان میں جاری جنگ و جدل کے باعث سب سے زیادہ متاثر ہوا ہے،عالمی برادری میں افغانستان کی مخدوش معاشی صورتحال کا ادراک، خوش آئند ہے،ضرورت اس امر کی ہے کہ عالمی برادری، افغان شہریوں کی اقتصادی بحالی کیلئے ہنگامی بنیادوں پر، ٹھوس اقدامات اٹھائے،
وزیر خارجہ نے یورپی یونین پر زور دیا کہ وہ افغانستان میں گذشتہ چار دہائیوں سے جاری محاذ آرائی کے خاتمے اور افغانستان میں دیرپا امن کیلئے اپنا کردار ادا کرے،وزیر خارجہ نے یورپی یونین کے وفد کو کابل سے انخلاء عمل کے دوران، پاکستان کی جانب سے فراہم کردہ معاونت کی تفصیلات سے آگاہ کیا،یورپی یونین کے وفد نے کابل سے یورپی ممالک کے سفارتی عملے اور شہریوں کے محفوظ انخلا میں پاکستان کی معاونت کو سراہتے ہوئے،
وزیر خارجہ مخدوم شاہ محمود قریشی اور پاکستانی قیادت کا شکریہ ادا کیا،وزیر خارجہ نے یورپی یونین کے وفد کی توجہ، مقبوضہ جموں و کشمیر میں جاری بھارتی مظالم اور انسانی حقوق کی سنگین خلاف ورزیوں کی جانب مبذول کرواتے ہوئے کہاکہ پاکستان، خطے میں امن و استحکام کا خواہاں ہے،فریقین نے پاکستان اور یورپی یونین کے مابین دو طرفہ تعلقات کو مزید مستحکم بنانے کیلئے، پہلے سے موجود میکنزمز کو مزید فعال بنانے کے عزم کا اظہار کیا،
