گلگت (صباح نیوز)گندم سبسڈی میں کمی کے خلاف گلگت بلتستان میں شٹر ڈاؤن اور پہیہ جام ہڑتال سے تمام 10 اضلاع میں نظام زندگی مفلوج ہو کر رہ گیا ۔ سیاسی، مذہبی اور قوم پرست جماعتوں پر مشتمل عوامی ایکشن کمیٹی کی کال پر آج گلگت بلتستان کے 10 اضلاع میں شٹر ڈاؤن اور پہیہ جام ہڑتال کی جارہی ہے۔ہڑتال کے باعث سڑکوں سے ٹرانسپورٹ غائب ہے اور مسافروں کو سنگین دشواریوں کا سامنا ہے ۔
پہیہ جام ہڑتال کے دوران گلگت بلتستان کے 10 اضلاع کے درمیان چلنے والی ٹرانسپورٹ کے ساتھ ساتھ راولپنڈی اور خیبرپختونخوا جانے والی ٹرانسپورٹ بھی بند ہے۔اس کے علاوہ شٹر ڈاؤن ہڑتال کے باعث تمام اضلاع کی ہزاروں دکانیں، سیکڑوں مارکیٹیں اور پلازے بند کر دیئے گئے ۔عوامی ایکشن کمیٹی کے رہنما غلام عباس نے کہا کہ گلگت بلتستان بھر کے تمام اضلاع میں گندم سبسڈی میں غیر معمولی کمی کے نتیجے میں گندم کی فی کلو قیمت میں ڈیڑھ سو فیصد تک اضافہ ہو گیا۔
انہوں نے کہا کہ صحت کارڈ سہولت کے خاتمے اور ٹیکسوں کے نفاذ کے خلاف تمام اضلاع میں شروع ہونے والی پہیہ جام اور شٹر ڈاون ہڑتال سے بین الاضلاع اور بین الصوبائی ٹرانسپورٹ مکمل طور پر بند ہے، تاہم ریلیوں کے لئے استعمال ہونے والی گاڑیوں اور ایمبولینس کو اجازت دے دی گئی ۔غلام عباس کے مطابق شٹر ڈاؤن اور پہیہ جام ہڑتال کل بھی جاری رہے گی۔
