لاہور(صباح نیوز)پنجاب حکومت نے نگران وزیراعظم انوارالحق کاکڑ سے رابطہ کا فیصلہ کرلیا۔وزیراعلی پنجاب محسن نقوی کی زیر صدارت خصوصی اجلاس ہوا، گندم کی کاشت اور یوریا کی دستیابی سے متعلق امور کا جائزہ لیا گیا، ایڈیشنل چیف سیکرٹری، چیئرمین پلاننگ اینڈ ڈویلپمنٹ بورڈ، سیکرٹریز زراعت، آبپاشی، خوراک، اطلاعات، کمشنر لاہور اور محکمہ زراعت کے متعلقہ افسروں نے اجلاس میں شرکت کی، صوبائی وزیر زراعت ایس ایم تنویر اور تمام ڈویژنل کمشنرز ویڈیو لنک کے ذریعے اجلاس میں شریک ہوئے۔نگران وزیراعلی نے کہا کہ پنجاب میں گندم کی فی من پیداوار کا ہدف یوریا کی کمی سے متاثر ہو سکتا ہے،
محسن نقوی نے کمشنرز کو ایپ پر متعلقہ اضلاع میں کھاد کی نقل و حمل کو یقینی بنانے کی ہدایت کر دی، کھاد کی دستیابی یقینی بنانے کے لئے تمام تر انتظامی اقدامات اٹھانے کا بھی فیصلہ کیا گیا۔محسن نقوی نے کہا کہ کھاد بنانے والی کمپنیوں اور ڈیلرز سے بھی رابطہ کیا جائے گا، کمپنیوں اور ڈیلرز کا اجلاس طلب کرلیا، کاشتکاروں کے حقوق کا تحفظ کریں گے،
وزیراعلی کو بریفنگ میں بتایا گیا پنجاب میں ایک کروڑ 60 لاکھ ایکڑ اراضی پر گندم کی بوائی کا ٹارگٹ حاصل کر لیا ہے۔بریفنگ میں مزید بتایا گیا ہدف سے زیادہ 6 لاکھ ایکڑ اراضی پر مزید بوائی ہوگی، انشا اللہ پنجاب بھر میں گندم کی پیداوار 30 سے 34 من فی ایکڑ متوقع ہے، بروقت گندم کی بوائی اور ڈی اے پی کے استعمال میں 52 فیصد اضافے سے بہتر پیداوار متوقع ہے، پنجاب میں تصدیق شدہ بیج کے استعمال میں 20 فیصد اضافہ ہوا ہے۔
