دھرم شالا انڈیا(صباح نیوز)انگلینڈ نے ورلڈ کپ 2023 کے پہلے میچ میں نیوزی لینڈ سے شکست کے بعد اپنے دوسرے میچ میں بنگلہ دیش کو 364 رنز کے جواب میں 227 رنز پر آوٹ کرکے 137 رنز سے کامیابی سمیٹ لی۔بھارت کے دھرم شالا اسٹیڈیم میں کھیلے جارہے میچ میں بنگلہ دیش ٹیم کے کپتان شکیب الحسن نے ٹاس جیت کر انگلینڈ کو پہلے بیٹنگ کی دعوت دی۔انگلینڈ کے اوپنرز نے شکیب الحسن کے فیصلے کا بھرپور فائدہ اٹھایا اور پہلی وکٹ کی شراکت میں 115 رنز جوڑ دیے۔جونی بیئر اسٹو آٹ ہونے والے پہلے بلے باز تھے جو 59 گیندوں پر 8 چوکوں کی مدد سے 52 رنز بنا کر شکیب الحسن کی گیند پر بولڈ ہوئے۔
انگلینڈ کی پہلی وکٹ 17 ویں اوور کی پانچویں گیند پر گری تو اسکور 115 تھا تاہم اوپنر ڈیوڈ ملان اور تجربہ کار جو روٹ نے ایک اور طویل شراکت کرتے ہوئے ٹیم کی ڈبل سنچری مکمل کی۔بنگلہ دیش کے فاسٹ بالرز وکٹ لینے میں ناکام ہوئے تو شکیب الحسن نے خود پہلی وکٹ حاصل کی اور دوسری وکٹ بھی اسپنر کے حصے میں آئی اور اس مرتبہ جارحانہ بیٹنگ کرنے والے ڈیوڈ ملان کو مہدی حسن نے بولڈ کیا۔ڈیوڈ ملان نے 107 گیندوں کا سامنا کرکے 16 چوکوں اور 5 چھکوں کی مدد سے 140 رنز بنائے اور دو مرتبہ سنچری شراکت میں حصہ دار بنے تاہم 38 ویں اوور میں 266 کے اسکور پر آوٹ ہوگئے۔ کپتان جوز بٹلر بھی تیز بیٹنگ کی کوشش میں 10 گیندوں پر ایک چوکے اور ایک چھکے کی مدد سے 20 رنز بنا کر شریف الاسلام کی وکٹ بنے اور 296 کے اسکور پر آوٹ ہوگئے۔جوروٹ نے بھی جارحانہ انداز میں بیٹنگ کی اور ٹیم کو بڑے اسکور کی جانب گامزن کردیا، ان کی اننگز 68 گیندوں پر 8 چوکوں اور ایک چھکے کی بدولت 82 رنز پر مشتمل تھی۔شریف الاسلام نے جوروٹ کو اننگز کے 42 ویں اوور میں آوٹ کیا، اس وقت انگلینڈ نے 307 رنز بنائے تھے۔لیام لیونگسٹن کو بھی شریف الاسلام نے آوٹ کیا اور جو کھاتہ کھولنے میں ناکام رہے۔ہیری بروکس 45 ویں اوور میں 327 کے اسکور پر آوٹ ہوئے، جنہوں نے 15 گیندوں پر 3 چوکوں کی مدد سے 20 رنز بنائے۔
سیم کیوران آوٹ ہونے والے ساتویں بلے باز تھے، جو 11 رنز بنا کر 334 کے اسکور پر مہدی حسن کا شکار بنے۔عادل رشید نے 11 رنز بنائے اور 49 ویں اوور کی تیسری گیند پر آوٹ ہوئے، عادل کو 352 کے اسکور پرمہدی حسن نے آوٹ کیا۔آخری آوٹ ہونے والے بلے باز کرس ووکس تھے، جو 11 گیندوں پر دو چوکوں کی مدد سے 14 رنز بنا کر انگلینڈ کو 362 رنز تک پہنچا کر آخری اوور کی دوسری گیند پر آوٹ ہوئے، انہیں تسکین احمد نے پویلین بھیج دیا۔انگلینڈ نے مارک ووڈ اور ریس ٹوپلی کے آوٹ ہوئے بغیر بالترتیب 6 اور ایک رن کی بدولت مقررہ اوورز میں 9 وکٹوں پر 364 رنز بنائے۔بنگلہ دیش کی جانب سے مہدی حسن نے 8 اوورز میں 71 رنز دے کر سب سے زیادہ 4 وکٹیں حاصل کیں۔شریف الاسلام نے 10 اوورز کرائے اور 75 رنز کے عوض 3 کھلاڑیوں کو آٹ کیا، تسکین احمد اور کپتان شکیگ الحسن کو ایک،ایک وکٹ ملی۔بنگلہ دیش کی ٹیم انگلینڈ کے 364 رنز کے جواب میں 49 ویں اوور کی دوسری گیند پر 227 رنز بنا کر آٹ ہوئی اور 137 رنز سے شکست کا سامنا کرنا پڑا۔واضح رہے کہ آئی سی سی ورلڈ کپ 2023 کے افتتاحی میچ میں نیوزی لینڈ نے ڈیون کونوے اور رچن رویندرا کی شاندار بیٹنگ کے ساتھ ساتھ عمدہ بالنگ کی بدولت دفاعی چیمپیئن انگلینڈ کو یک طرفہ مقابلے کے بعد 9 وکٹوں سے شکست دی تھی۔دوسری جانب میگا ایونٹ کے اپنے پہلے میچ میں بنگلہ دیش نے مہدی حسن میراز اور شکیب الحسن کی عمدہ بالنگ کی بدولت افغانستان کو بآسانی 6 وکٹوں سے شکست سے دوچار کیا تھا اور 157 رنز کا ہدف 35ویں اوور میں حاصل کر لیا تھا۔
