اسلام آباد(صباح نیوز )انسداد دہشت گردی کے لیے نیشنل ایکشن پلان پر عملدرآمد کے معاملہ پر نیشنل ایکشن پلان کی ایپکس کمیٹی کا اجلاس کل(سوموار)کو منعقدہوگا۔وزیر اعظم میاں محمد شہباز شریف اجلاس کی صدارت کریں گے، اجلاس میں اعلی عسکری و سول قیادت و متعلقہ وفاقی وزراء شرکت کریں گے، اجلاس میں صوبائی وزرا اعلی، انٹیلی جنس اداروں کے سربراہان بھی شرکت کریں گے۔
اجلاس میں امن وامان کی مجموعی صورتحال کا تفصیلی جائزہ لیا جائے گا۔انسداد دہشت گردی کے قومی ایکشن پلان پر عمل درآمد کی صورت حال بھی زیر غور آئے گی، صوبوں اور وفاق کے درمیان کوآرڈی نیشن بہتر بنانے اور انٹیلی جنس معلومات کی موثر شیئرنگ پر بھی غور ہوگا، خیبر پختونخوا اور بلوچستان میں دہشت گردی کے بڑھتے واقعات کی وجوہات کا بھی جائزہ لیا جائے گا۔اجلاس کو انٹیلی جنس بیسڈ آپریشنز کے نتائج سے بھی آگاہ کیا جائے گا، اجلاس میں داخلی سلامتی کو یقینی بنانے کے لیے اہم فیصلوں کی بھی منظوری دی جائے گی۔
