اسلام آباد(صباح نیوز)سپیکر قومی اسمبلی سردار ایاز صادق نے کہا ہے کہ آزاد میڈیا ملک کی ترقی اور خوشحالی کیلئے نا گزیر ہے، تحقیق اور حقائق پر مبنی صحافت جمہوریت کو مضبوط کرتی ہے۔ ورلڈ نیوز ڈے پر اپنے پیغام میں ایازصادق نے کہا کہ آزاد میڈیا ملک کی ترقی اور خوش حالی کے لیے نا گزیر ہے۔انہوں نے کہا کہ سچائی کو فروغ دینے میں صحافت کا کردار اہمیت کا حامل ہے۔
اسپیکر قومی اسمبلی نے کہا کہ ڈیجیٹل دور میں غلط معلومات اورجعلی خبروں کے پھیلا کا سدباب کرنا چیلنج ہے اور ایسی صورتِ حال میں جمہوریت، شفافیت اور معاشرے میں جوابدہی کے فروغ میں میڈیا کا کردار قابلِ ستائش ہے۔انہوں نے کہا کہ تحقیق اور حقائق پر مبنی صحافت جمہوریت کو مضبوط کرتی ہے۔
ایاز صادق نے کہا کہ سچائی کو سامنے لانے کے لیے صحافیوں کی قربانیوں کو خراجِ تحسین پیش کرتا ہوں۔انہوں نے کہا کہ قومی اسمبلی ملک میں آزادی اظہار رائے کے تحفظ کے لیے اپنا کردار ادا کرتی رہے گی۔سپیکرقومی اسمبلی نے میڈیا اداروں، صحافیوں اورصحافتی تنظیموں کی خدمات کو سراہا۔
