پشاور(صباح نیوز)خیبر پختونخوا میں سرکاری ملازمین کے اغوا اور قتل کے پیش نظر میں محکمہ داخلہ نے تمام سرکاری ملازمین کو محتاط رہنے کی ہدایت کی ہے۔
خیبر پختونخوا کے محکمہ داخلہ کے اعلامیے کے مطابق بنوں ڈویژن میں سرکاری اہلکاروں اور افسران کے اغوا اور قتل کے واقعات تواتر سے رونما ہو رہے ہیں۔ اس حوالے سے سرکاری ملازمین کے لیے ٹریول ایڈوائزری جاری کی گئی ۔اس حوالے سے جاری کردہ ہدایت نامے میں تمام سرکاری ملازمین سے کہا گیا کہ وہ نقل و حرکت کے معاملے میں محتاط رہیں اور اس حوالے سے سکیورٹی کا پورا خیال رکھیں
محکمہ داخلہ کے اعلامیے میں کہا گیا کہ محرم الحرام کے دوران سرکاری ملازمین کا آبائی علاقوں میں جانا خطرناک ہے۔ متعلقہ حکام اس حوالے سے بے داغ سکیورٹی اقدامات یقینی بنائیں۔سرکاری ملازمین سے کہا گیا کہ وہ اپنی نقل و حرکت کے بارے میں لوگوں کو کم از کم معلوم ہونے دیں۔ ساتھ ہی ساتھ یہ ہدایت بھی کی گئی ہے کہ اپنے سفر کے بارے میں متعلقہ افسران کو باخبر رکھیں۔
