سری نگر:جموں وکشمیر نیشنل فرنٹ کے چیرمین اورکل جماعتی حریت کانفرنس کے رہنما نعیم احمد خان نے بھارت میں مودی حکومت پر واضح کیا ہے کہ وہ اپنے ہندوتوا ایجنڈے کو نافذ کرکے مقبوضہ جموں و کشمیر میں زمینی حقائق کو تبدیل نہیں کر سکتی اور جلد یا بدیر بھارت کو اقوام متحدہ کی قراردادوں کے مطابق تنازعہ کشمیر کو حل کرناپڑے گا۔
نعیم احمد خان نے جو بھارت کی تہاڑ جیل میں غیر قانونی طور پر نظربند ہیں ، ایک پیغام میں افسوس کا اظہار کیا کہ جموں و کشمیر کے لوگوں کے نہ صرف تمام شہری اور قانونی حقوق بلکہ ان کے بنیادی انسانی اور مذہبی حقوق بھی سلب کیے گئے ہیں۔
انہوں نے کہا کہ جب بھی پاکستان اور بھارت نے مذاکرات کا آغاز کیا کشمیریوں نے اس عمل کو سراہا۔ انہوں نے کہا کہ پابندیاں لگانے اور لوگوں کو جیلوں میں ڈالنے سے کوئی مسئلہ حل نہیں ہوگا کیونکہ طاقت کے استعمال سے عوام کی امنگوں کو دبایا نہیں جا سکتا۔انہوں نے کہا کہ حریت قیادت کا مسئلہ کشمیر پر اصولی موقف ہے جس کی پوری دنیا حمایت کرتی ہے۔
