لاہور (صباح نیوز) سندھ، پنجاب اور خیبر پختونخوا کے مختلف علاقوں میں میں دھند چھائی رہی ، حد نگاہ صفر ہونے پر موٹرویز کو کئی مقامات سے بند کردیا گیا۔
ترجمان موٹرویز پولیس کے مطابق موٹر وے ایم ٹو لاہور سے کوٹ سرور ، لاہور ملتان موٹرے وے ایم تھری فیض پور سے رجانہ تک شدید دھند کے باعث بند کر دی گئی۔
ترجمان نے کہا کہ موٹر وے ایم فور کو فیصل آباد سے عبدالحکیم،درکھانہ سے جڑانوالہ اور سکھر ملتان موٹروے ایم 5 کو حد نگاہ انتہائی کم ہونے کے باعث بند کر دیا گیا۔قومی شاہراہوں پر بھی دھند کے باعث ٹریفک کی روانی متاثر رہی،پروازیں بھی تاخیرکا شکار ہوئیں۔
ترجمان نے مزید کہا کہ شہری غیر ضروری سفر سے گریز کریں، تیز رفتاری سے پرہیز کریں اور اگلی گاڑی سے مناسب فاصلہ رکھیں، شہری کسی بھی قسم کی معلومات اور مدد کیلئے ہیلپ لائن 130 پر رابطہ کریں جبکہ موٹروے پولیس ہمسفر ایپ سے بھی معلومات لی جا سکتی ہیں۔
