لیجنڈری اداکارہ سلطانہ ظفر انتقال کرگئیں


ٹیکساس:تنہائیاں اور ان کہی جیسے مقبول ترین ڈراموں میں اداکاری کرنے والی پاکستان کی لیجنڈری اداکارہ سلطانہ ظفر انتقال کرگئیں۔ سلطانہ ظفر کے خاندانی ذرائع نے بتایا کہ اداکارہ کا انتقال امریکا میں گزشتہ شب ہوا۔

تاہم سلطانہ ظفر کے خاندانی ذرائع کی جانب سے ان کے انتقال کی وجہ بیان نہیں کی گئی۔لیجنڈری اداکارہ امریکی ریاست ٹیکساس کے شہر ڈیلاس میں مقیم تھیں اور ‘ارمیل اسٹوڈیو’ کے نام سے امریکا میں ایک بوتیک چلارہی تھیں۔

انہوں نے سوگواران میں 2 بیٹے چھوڑے ہیں جو امریکا ہی میں مقیم ہیں۔دوسری جانب پاکستان نیشنل کونسل آف آرٹس(پی این سی اے)کی جانب سے سلطانہ ظفر کے انتقال کی تصدیق کی گئی۔فیس بک اور ٹوئٹر پر شیئر کی گئی پوسٹس میں پی این سی اے نے کہا کہ ماضی کی مقبول اداکارہ سلطانہ ظفر امریکا میں انتقال کرگئیں۔

ٹوئٹ میں مزید کہا گیا کہ وہ پاکستانی ڈراما انڈسٹری کا ایک بڑا نام تھیں، سلطانہ ظفر تنہائیاں اور ان کہی میں اداکاری کے لیے جانی جاتی ہیں۔سلطانہ ظفر اپنے منفرد حیدرآباد لب و لہجے کی وجہ سے جانی جاتی تھیں۔انہوں نے تنہائیاں، ان کہی، آخری چٹان سمیت پاکستان ٹیلی ویژن (پی ٹی وی)کے متعدد ڈراموں میں اداکاری کی تاہم انہیں تنہائیاں میں ادا کیے جانے والے مختصر کردار سے بہت زیادہ مقبولیت حاصل ہوئی تھی۔