زائد کام کرنے کی وجہ سے سالانہ ہزاروں افراد موت کی آغوش میں چلے جاتے ہیں،ڈبلیو ایچ او


جنیوا:عالمی ادارہ صحت(ڈبلیو ایچ او)نے کہا ہے کہ زیادہ کام کرنے کی وجہ سے سالانہ ہزاروں افراد موت کے منہ میں چلے جاتے ہیں۔

غیر ملکی خبر رساں ادارے کے مطابق ڈبلیو ایچ او کی ایک تازہ رپورٹ میں کام کے طویل اوقات سے انسانی صحت پر پڑنے والے برے اثرات پر تفصیلی بحث کی گئی۔اس رپورٹ کے مطابق کام کے طویل اوقات کی وجہ سے انسانی صحت پر اتنے برے منفی اثرات پڑ سکتے ہیں کہ اس کی وجہ سے موت بھی واقع ہو سکتی ہے۔ اقتصادی عدم اطمینان کی وجہ سے کئی لوگوں کو طویل اوقات تک کام کرنا پڑتا ہے اور یہ صورت حال عالمی وبا کورونا کے ایام میں خاص طور پر زیادہ دیکھی گئی۔

رپورٹ میں کہا گیا کہ زیادہ کام کرنے کی وجہ سے انسانوں کو مختلف امراض کا بھی سامنا کرنا پڑتا ہے  جس میں عارضہ قلب سب سے زیادہ ہے۔سال 2016 میں کام کے طویل اوقات کی وجہ سے دنیا بھر میں 7 لاکھ 45 ہزار افراد اپنی زندگی سے محروم ہو گئے تھے۔ ان میں سے زیادہ تر افراد کی موت ہارٹ اٹیک اور ہیٹ اسٹروک کی وجہ سے ہوئی تھی۔ یہ اضافہ سال 2000 کے مقابلے میں 30 فیصد زیادہ ہے۔ریسرچ میں واضح کیا گیا کہ دنیا میں کام کے زیادہ اوقات کا سامنا کرنے والی آبادی نو فیصد ہے۔

کام کے طویل اوقات کارکنوں کی موت کا سبب بن رہے ہیں، ڈبلیو ایچ او

ڈبلیو ایچ او کے شعبہ ماحولیات و صحت کی ڈائریکٹر ماریہ نے کہا کہ ایک ہفتے میں پچپن گھنٹے کام کرنے سے صحت کے شدید مسائل جنم لے سکتے ہیں۔ انہوں نے کہا کہ اس کے لیے عام لوگوں تک بنیادی معلومات پہنچانا اور ملازمین کی صحت کا تحفظ بھی بہت ضروری ہے۔ڈبلیو ایچ او کے ڈائریکٹر جنرل ٹیڈروس آڈہانوم گیبرائسس نے کہا کہ حکومت اور اداروں کو اپنے ملازمین کی صحت کو مقدم سمجھنا چاہئے جبکہ ملازمین کو اس بات کا خیال رکھنا چاہئے کہ زندگی کے سامنے روزگار کی کوئی اہمیت نہیں اور بہتر ہے کہ کام اس طرح کیا جائے کہ ہارٹ اٹیک یا اسٹروک سے محفوظ رہا جائے۔