اداکاررنگیلا کو مداحوں سے بچھڑے 16 برس بیت گئے


لاہور:معروف زمانہ مزاحیہ اداکار محمد سعید خان عرف رنگیلا کی آج 16 ویں برسی منائی جار ہی ہے۔

اپنے مخصوص انداز سے شائقین کو محظوظ کرنے والے اداکار رنگیلا نے اپنے فلمی سفر میں 600سے زائد فلموں میں اداکاری کے جوہر دکھائے اور صدارتی تمغہ برائے حسن کارکردگی سمیت متعدد ایوارڈ بھی اپنے نام کئے، شہنشاہ ظرافت منور ظریف کے ساتھ ان کی جوڑی کا تو خوب چرچا رہا۔

اپنی انوکھی اداکاری سیلاکھوں پرستاروں کے دلوں پر راج کرنے والے محمد سعید خان عرف رنگیلا یکم جنوری1937 کو افغانستان میں پیدا ہوئے۔بچپن میں سر سے والدین کا سایہ سر سے اٹھ گیا، اور وہ بہن کے ساتھ پشاور آگئے۔

ابتدا میں انہیں فلم داتا، نوراں، چوڑیاں اور موج میلہ میں چھوٹے موٹے مزاحیہ کردار ملے۔ 1963میں فلم داغ اور ہتھ جوڑی کی کامیابی اور بے ساختہ مزاحیہ اداکاری نے انہیں شہرت کی بلندیوں پر پہنچا دیا۔تن سازی کے مقابلے میں شرکت کرنے اسٹیج پر آئے، باڈی بلڈنگ کے پوز دیے تو حاضرین ہنس ہنس کر لوٹ پوٹ ہو گئے، یہی وہ لمحہ تھا جب رنگیلا نے فلموں میں کام کرنے کی لگن اور جستجو کو اور زیادہ تیز کیا اور ہیرو بننے کی بجائے کامیڈین کے طور پر اپنی پہچان قائم کرنے کا فیصلہ کیا۔ اور اپنا فلمی نام رنگیلا منتخب کیا۔

معروف فنکار و مزاح نگار فاروق قیصر عرف انکل سرگم انتقال کر گئے،صدر،وزیراعظم کااظہارتعزیت

کیریئر کے اس موڑ پر رنگیلا کو منور ظریف کا ساتھ مل گیا اور دونوں نے ایسی جوڑی بنائی جو ہر فلم کے لیے کام یابی کی ضمانت سمجھی جانے لگی۔ بلکہ کئی فلمیں تو ایسی ہیں جن میں یہی دو کامیڈین بطور ہیرو جلوہ گر ہوئے۔

رنگیلا نے چھ سو سے زائد فلموں میں کام کیا۔ ان میں 244 اردو، 395 پنجابی اور 19 فلمیں پشتو زبان کی بھی تھیں۔ بطور پروڈیوسر اور ہدایت کار بھی ان کی صلاحتیں نکھر کر سامنے آئیں۔ رنگیلا نے ایک گیت گا میرے منوا گاتا جا رے بھی خود ہی گایا اور آج تک مقبول ہے۔ان کی مشہور فلموں میں رنگیلا، دل اور دنیا، کبڑا عاشق، عورت راج، پردے میں رہنے دو،ایماندار، بے ایمان، انسان اور گدھا اوردو رنگیلے شامل ہیں۔ بہترین اداکاری اور دیگر شعبوں میں شاندار کارکردگی پرنو مرتبہ نگار ایوارڈ اپنے نام کیے۔

طویل عرصہ جگر اور گردے کے عارضے میں مبتلا رہنے کے بعد 24 مئی 2005 کو ہمیشہ کے لیے اس دار فانی سے رخصت ہو گئے لیکن ان کی اداکاری کے منفرد انداز کو بھلانا کسی طور پر ممکن نہیں۔