امریکی صدر کو قتل کرنے کیلئے آنے والا بھارتی نوجوان گرفتار


واشنگٹن (صباح نیوز)امریکی حکام نے وائٹ ہاوس کے قریب ٹرک سے امریکی صدر کو نقصان پہنچانے کی دھمکی دینے والے بھارتی نژاد نوجوان کو گرفتار کرلیا ہے۔

حکام کے مطابق نوجوان نازی پرچم کے ساتھ ٹرک سے باہر نکلا اور پولیس پر چیخنے لگا۔غیر ملکی میڈیا کے مطابق امریکی دارالحکومت واشنگٹن میں سیکیورٹی فورسز نے میزوری سے تعلق رکھنے والے ایک بھارتی نوجوان کو گرفتار کیا ہے، جس کے بارے میں پولیس کا خیال ہے کہ اس نے وائٹ ہاوس کے پارک میں جان بوجھ کر ٹرک سے ایک حفاظتی رکاوٹ کو ٹکر ماری، البتہ اس واقعے میں کوئی زخمی نہیں ہوا۔

وائٹ ہاوس کی پریس سیکریٹری نے بتایا کہ صدر بائیڈن کو منگل کی صبح سیکرٹ سروس اور پارک پولیس نے ٹرک حادثے کے بارے میں بریفنگ دی تھی۔سیکرٹ سروس نے ایک بیان میں کہا کہ ڈرائیور نے پیر کی رات کو تقریبا 10 بجے وائٹ ہاوس سے متصل لافائیٹ اسکوائر کے شمال میں نصب بیریئر سے اپنا ٹرک ٹکرایا تھا، گرفتار کئے گئے نوجوان کی شناخت 19 سالہ سائی ورشت کنڈولا کے نام سے کی گئی ہے، جس کا تعلق میزوری سے ہے اور وہ بھارتی نژاد ہے۔عینی شاہدین نے میڈیا کو بتایا کہ گاڑی ٹکرانے کے بعد ورشت کنڈولا ایک نازی پرچم کے ساتھ ٹرک سے باہر نکلا، پارک پولیس اور سیکرٹ سروس کے افسران کے قریب پہنچنے کے بعد وہ ان پر چیخنے لگا۔

لوگوں کا کہنا ہے کہ جب تفتیش کاروں نے اس سے پوچھ گچھ کی تو کنڈولا نے کہا کہ وہ حکومت پر قبضہ کرنے کیلئے آیا ہے صدر جو بائیڈن کو قتل کرنا چاہتا تھا۔خبر رساں ادارے کا کہنا ہے کہ لوگوں کو تحقیقات سے متعلق مخصوص تفصیلات شیئر کرنے سے منع کیا گیا تھا، اس لئے انہوں نے نام ظاہر نہ کرنے کی شرط پر یہ باتیں بتائیں۔۔